Йыл аҙағына тиклем республиканың балалар баҡсаларында урын етмәү мәсьәләһе тулыһынса хәл ителәсәк. Был – республика етәкселегенең мәсьәләне яйға һалыу йәһәтенән ныҡышмалы хеҙмәте һөҙөмтәһе.
Мәғлүм булыуынса, мәктәпкәсә учреж­дениеларҙа кескәйҙәргә урын етмәү һуң­ғы йылдарҙа иң ҡырҡыу проблемалар рәтендә торҙо. Шулай ҙа тыуымдың артыуына бәйле мәсьәләне республика етәк­селегенең үҙ контроленә алып, хәл итеүгә ҙур тырышлыҡ һалыуы арҡаһында төбәк халҡы бигүк ауырлыҡ кисермәне. Яңы балалар баҡсалары төҙөү менән бер рәттән иҫкеләре реконструкцияланды, элек баш­ҡа ойошма-предприятиеларға тапшы­рыл­ған биналар мәғариф ҡарамағына кире ҡайтарылды. Учреждениеларҙа заманса шарттар тыуҙырыуға ҙур иғтибар бүле­не­үе, электрон сират булдырыу, тәрбиәсе­ләрҙең белемен камиллаштырыу һәм башҡа саралар мәктәпкәсә учрежде­ние­ларҙың ҡеүәтен бермә-бер арттырҙы. Хеҙмәт һөҙөмтәһенән ата-әсә лә ҡәнәғәт.
Уңышлы эшмәкәрлектең бер дәлиле булып кисә Өфө районының Чесноковка ауылында “Сәпәкәй” тип аталған ике ҡат­лы заманса балалар баҡсаһы асылды. “Берҙәм Рәсәй” партияһының “Халыҡ ҡаҙнаһы” проектына ярашлы төҙөлгән учреждениены асыу тантанаһында республика Хөкүмәтенең Премьер-министры урынбаҫары Владимир Нагорный, Өфө районы хакимиәте башлығы Вилорий Угаров, эште лайыҡлы атҡарып сыҡҡан “Альянс” идара итеү компанияһы директоры Вадим Сәйфуллин ҡатнашып, балалар баҡсаһы коллективына, ата-әсәгә, кескәй­ҙәргә күркәм байрам уңайынан иң изге теләктәрен еткерҙе. Сығыштарҙа билдә­ләнеүенсә, халҡының күпселеген йәш ғаиләләр тәшкил иткән Чесноковка ауыл хакимиәте биләмәһендә ошо арауыҡта ғына өс яңы кескәйҙәр учреждениеһы эш башлаған. Араларында дәүләт ҡаҙнаһы иҫәбенә төҙөлгәндәр ҙә, шәхси инвестор ярҙамында асылғандар ҙа бар.
“Бәхет, шатлыҡ бергәләп
Беҙҙең менән йәшәһен!”
– тигән юлдар яңғыраны кескәйҙәр ятлаған бер шиғырҙан. Ауылдың иң бейек ерендә мәсеткә һыйынып урынлашҡан балалар баҡсаһы, һис шикһеҙ, яҡты хыялдарҙы тормошҡа ашырыр.