Яратҡан эшен яҙмышының айырылғыһыҙ өлөшө итеп, бар булмышын уға арнап йәшәгән кешенең хеҙмәте емешле була. Сибай ҡалаһындағы махсус (коррекцион) белем биреү мәктәбенең беренсе категориялы башланғыс кластар уҡытыусыһы Гөлнара Кинйәбулатова – тап шундайҙарҙан.

Бала саҡтан уҡытыусы булырға хы­ялланған ҡыҙ Баймаҡ районының Төрөкмән мәктәбен тамамлағас, белем алыуын Өфөләге 1-се педагогия учили­щеһында дауам итә. Хеҙмәт юлын Ал­тын ҡасабаһындағы башланғыс мәк­тәп­тә уҡытыусы булып башлай. Эш араһында БДУ-ның Сибай институтын ситтән тороп тамамлай.
– Һайлаған һөнәремә рәхмәтлемен, – ти Гөлнара Хөрмәт ҡыҙы. – Бала­лар­ҙы яратам, тормошомдо уларһыҙ күҙ алдына ла килтерә алмайым. Һөнәрем йәш быуын күңеленә юл табыусы, дө­рөҫ кәңәш биреүсе, ярҙам күрһә­теү­се нескә психолог та булыуҙы талап итә.
Заман менән бергә атлаған педагог мәғариф өлкәһендәге һәр үҙгәрешкә тиҙ яраҡлаша, яңы технологияларҙы, уҡытыу алымдарын даими өйрәнә. Магнитогорск педагогия институтында уҡытыусы-логопед һөнәрен үҙләште­рергә лә өлгөрә.
Сибайҙағы махсус (коррекцион) бе­лем биреү мәктәбенә эшкә һис көт­мә­гәндә саҡыралар Гөлнара Хөрмәт ҡы­ҙын. Педагог ундағы хеҙмәттең ни тиклем яуаплы, ауыр булырын яҡшы аңлаһа ла, ризалаша. Һөҙөмтәлә 2007 йылдан алып әлегә ҡәҙәр һаулығы буйынса мөмкинлеге сикләнгән бала­ларға башланғыс белем бирә.
– Эшем еңелдән түгел, – ти уҡы­тыу­сы. – Әммә балаларҙың белем алыуға шул ҡәҙәр ҙур ынтылышы бар­лыҡ ауыр­лыҡты оноттора. Килгәндә ҡу­лына ручка ла тота белмәгән кес­кәй­ҙәрҙең артабан яйлап яҙырға өйрә­не­үен, һү­рәт төшөрә, хәрефләп уҡый баш­лауын күреү йөрәккә әйтеп аңлата алмаҫлыҡ рәхәтлек бирә. Һәр береһенә айырым иғтибар кәрәклектән, улар менән шәхсән шөғөлләнәм.
Әлбиттә, бындай уҡыу йортонда төр­лө хәл булыуы ихтимал, әммә Гөл­на­­ра Хөрмәт ҡыҙы һис ҡасан юғалып ҡалмай. Көсөргәнешле осраҡтарҙан сы­ғыу юлын тиҙ тапҡан булдыҡлы, көс­лө рухлы педагогты ата-әсә лә хөрмәт итә.
– Улар менән тығыҙ бәйләнештә эшләйбеҙ, шунһыҙ мөмкин түгел, – ти Гөлнара Хөрмәт ҡыҙы. – Балаһын ата-әсә үҙе мәктәпкә алып килә, дәрес бөткәс, алып ҡайта. Күмәкләп йырларға өйрәнәбеҙ, бейеп тә алабыҙ. Ата-әсәгә лә, беҙгә лә еңел түгел, ауырлыҡтарҙы бергәләп еңергә, ҡаршылыҡтарҙы йы­рып сығырға тырышабыҙ.
Белем алыуға көслө ынтылыш ыңғай һөҙөмтә бирмәй ҡалмай. Бындай ныҡышмалдар, тормош нисек кенә ауыр бирелмәһен, киләсәктә үҙ юлын таба. Мәктәптә тәрбиәләнгәндәр ара­һын­да хатта үҙ эшен асҡандар ҙа бар. X кластан һуң (бындай учреждение­ларҙа ун йыл уҡыйҙар) күпселек белем алыуын һөнәри уҡыу йорттарында дауам итә. Артабан төрлө ойош­ма­ларҙа уңышлы эшләйҙәр. Гөлнара Хөр­мәт ҡыҙы әйтеүенсә, махсус мәктәптә үҙенә оҡшаған шөғөлдө һайлап, шул йүнәлештә камиллашҡан уҡыусылар тормошта юғалып ҡалмай. Уҡытыу­сы­ларға, ата-әсәгә таянып, уларҙың ярҙа­мын, һөйөүен тойоп үҫеү һаулығы буйынса мөмкинлеге сикле балалар өсөн айырыуса мөһим. Махсус мәк­тәптә уҡыусыларҙың буш ваҡы­тын файҙалы үткәреү өсөн төрлө түңә­рәк, спорт секциялары эшләүе, сәләмәт­леккә ҙур иғтибар бүленеүе тотош коллективтың уңышлы хеҙмәте тураһында һөйләй.
Эшендә генә түгел, шәхси тормошонда ла бәхетле Гөлнара Хөрмәт ҡыҙы. Ире Ислам менән дүрт бала үҫтерәләр. Өлкән улдары Артур менән Ильяс юғары уҡыу йортонда ғилем туплаһа, Айгөл VII класта уҡый, төпсөк­тәре Байрас балалар баҡсаһына йө­рөй. Кинйәбулатовтарҙың Иҫке Сибай ауылындағы сәскәгә күмелгән күркәм йорто әллә ҡайҙан балҡып күренеп ултыра. Уңған хужа менән хужабикәнең ҡулынан килмәгән эше юҡ. Татыу ғаилә буш ваҡытта күмәкләп тәбиғәткә сы­ғырға, республиканың билдәле урындарына сәйәхәт ҡылырға ярата.
– Яратҡан ғаиләм – күңелем нуры, тормошомда, эшемдә ышаныслы терә­гем, – ти Гөлнара Хөрмәт ҡыҙы.