Шоферҙар, шәфҡәт туташтары, табиптар, етәкселәр... Республика Башлығы Рөстәм Хәмитовтың ҡулынан дәүләт бүләген алған бәхетлеләр араһында төрлө һөнәр эйәләре бар ине. Рөстәм Зәки улы, уларҙы ошо матур тантана айҡанлы ҡотлап, уңыштар теләне.
– Бүләгегеҙҙе намыҫлы хеҙмәтегеҙ менән яуланығыҙ, ул һеҙҙе артабан да юғары үрҙәргә дәртләндерһен, – тине ул.

Балтас районының “Рәсәй” асыҡ акцио­нер­ҙар йәмғиәтендә тракторсы-машинист булып эшләгән Рәдис Зыяитдинов республиканың Почет грамотаһы менән бүләкләнде. Туған хужалығында 20 йылдан ашыу тир түккән ауыл эшсәне үҙ вазифаһына яуаплы ҡа­рауы менән хөрмәт ҡаҙан­ған.
“Южурал-Ойл” асыҡ акцио­нер­ҙар йәмғиәте­нең генераль директоры Зиннур Ис­хаҡов­тың на­мыҫлы хеҙ­мә­те “Баш­ҡортостан Рес­пуб­ли­ка­һы­ның атҡаҙанған нефт­сеһе” тигән маҡтау­лы исемгә лайыҡ бул­ды. Зиннур Закир улы етәк­ләгән ойошма нефть сығарыу ҡорамал­да­рын йүнәтеү буйынса республикала ғына тү­гел, сит та­раф­тарҙа ла та­ны­лыу яулаған. Бул­дыҡлы хужа балалар йорттарына, мәктәп-интернаттарға, йә­мә­ғәт ойошмаларына йыш ярҙам итә.
Дүртөйлө урмансылығынан Рәшит Ғари­пов “Башҡортостандың атҡаҙанған урмансы­һы” тигән исемгә лайыҡ булды.
М.М. Азаматов исемендәге 3-сө балалар һәм үҫмерҙәр мәктәбе директоры Рәмил Юлдашев та – республикала билдәле шәхес. Ошо белем усағында хеҙмәт юлын хоккей буйынса тренер булып башлаған уҙаман ба­ла­лар­ҙы һау-сәләмәт йәшәү өлгөһөндә тәр­биәләү, спортҡа ылыҡтырыу йүнәлешендә ҙур эш алып бара. Рәмил Ғәләүетдин улы “Башҡорт­ос­тандың атҡаҙанған физик культура хеҙмәт­кәре” тигән исемде йөрөтәсәк.