Билдәле, йәштәр араһындағы экстремизм, терроризм күренештәренә ҡаршы иң әһәмиәтле саралар – иҫкәртеүсе һәм тәрбиәүи проекттар. Был эштәрҙе тормошҡа ашырыусы төп тармаҡ, әлбиттә, мәғариф өлкәһе. Тап мәктәптәрҙә, колледждарҙа, юғары уҡыу йорттарында йәштәр шәхес булараҡ формалашыу юлын үтә.

Ошоно күҙ уңында тотоп, белем биреү учреждениеларында, шулай уҡ уҡытыусылар өсөн аңлатыу эштәре йыш уҙғарыла. Мәҫәлән, күптән түгел Башҡорт дәүләт университетында “Бе­лем биреү даирәһендә экстре­мизмға һәм киҫкен идеология тара­тыуға ҡаршы тороу” тип исемләнгән семинар булды. Ойоштороусылары – республи­каның Мәғариф министр­лы­ғы, Баш­ҡорт­остан Башлығы ҡарама­ғын­дағы дәүләт-конфессия мөнә­сә­бәттәре буйынса совет, Баш­ҡорт дәүләт универ­си­теты һәм Өҙ­лөкһөҙ белем биреү инс­титуты. Һөй­ләшеүҙә республика­ның төрлө район-ҡалаһынан тормош хәүефһеҙлеге нигеҙҙәре дәресен алып барған 200-гә яҡын педагог ҡатнашты.
Мәғариф ойошмаларында хәүеф­һеҙ­лек сараларының комплекслы системаһын төҙөү мөһим тигән уртаҡ фекер яңғыраны сарала. Бының өсөн тәү сиратта педагогтарға экстремистик идеологияның асылы, уның алымдары, зарары тураһында аныҡ белем туплау мөмкинлеген биргән мәғлүмәт мөхите булдырыу зарур.
Сығыштарҙа республикалағы, илдә­ге дини тәрбиә, төрлө киҫкен ағым­дарға ҡаршы көрәш саралары хаҡында бәйән ителде, фекер алышынды. Йәштәрҙе хәүефле юлдарҙан аралау менән бер рәттән, уларҙы толе­рантлыҡ, илһөйәрлек рухында үҫтереү мөһимлеге билдәләнде.