Туйышта элек-электән иманлы, ғилемгә ынтылышлы халыҡ йәшәгән. Ауыл бәләкәй булыуына ҡарамаҫтан, әле лә уның ҡап уртаһында Аллаһ йорто урын алған. Имам-хатип Мортаза Мөхәмәҙиев әйтеүенсә, мәсеткә халыҡ күпләп йөрөй. Йома көндө хатта күрше Байым, Ғәбдин ауылдарынан да киләләр.

– Халҡыбыҙҙың иман­ға ҡайтыуы һөйөн­дөрә, – ти имам-хатип. – Улар дини байрам­дарҙа күпләп ҡатнаша, йома намаҙҙарына их­лас йөрөй. Йәштәрҙең, айырыуса балаларҙың хаҡ юлға тартылыуы ҡыуаныслы.
Мәсеткә Белорет мәҙ­рәсәһенән килеп, дин дәрестәре үткә­рә­ләр икән. Ошоғаса ҡа­тын-ҡыҙ менән ир-ат бергә белем алһа, быйылдан уларҙы айырым уҡыта башла­ғандар. Йәйге­һен балалар өсөн дини һабантуй ойошторол­ған, унда йәш быуын вәкилдәре генә түгел, өлкәндәр ҙә ихлас ҡатнашҡан. Район буйынса үткәрелгән “Иман нуры” конкурстарынан да бәләкәй туйыштар еңеүһеҙ ҡайт­май. Имам-хатип Мортаза Мостафа улы уларға ҡулынан кил­гәнсә ярҙам итә, төрлө сүрәләр өйрәтә. Ул үҙе уҙған йыл йомғаҡтары буйынса Башҡортостан мосолмандарының Диниә назараты тарафынан “Иң яҡшы имам” исеменә лайыҡ тип билдәләнгән.
Туйыштар мосол­ман­дарҙың иң изге байрамы Ҡорбанды матур итеп үткәреп ебәрҙе. Ауылда күптәр ҡорбан салды. Һәр ваҡытта­ғы­са, бергәләп вәғәз тың­ланылар, диндарҙар йә­мәғәт намаҙын уҡы­ны. Халыҡ өсөн Ҡорбан ашы әҙерләнде, бала­ларға күңелле уйындар ойошторолдо.