Санкт-Петербургта Европа-Азия ҡатын-ҡыҙҙарының форумы асылды. Социаль хәүефһеҙлек, халыҡ-ара эшмәкәрлек, гүзәл заттың иҡтисадта һәм сәйәсәттә тотҡан урыны хаҡында һөйләшеү менән башланып китте был сара. Ойоштороусылары – Бойондороҡһоҙ Дәүләттәр Берләшмәһе ағзаларының парламент-ара ассамблеяһы һәм Рәсәй Федераль Йыйылышының Федерация Советы.
Нева буйындағы ҡалаға был көндә донъяның 85 иленән вәкил­дәр, йәмғеһе 700 ҡатын-ҡыҙ йыйылды. Улар – дәүләт эшмәкәрҙәре, эшҡыуарҙар, ғалимәләр һәм йәмәғәт ойошмаларында әүҙемлек күрһә­теүселәр. Федерация Советы спикеры Валентина Матвиенко иһә был сарала ҡатнашып ҡына ҡалманы, ә алып барыусы булараҡ та сығыш яһаны. Йыйын социаль-иҡтисади, закондар сығарыу, сәйәси, дипломатия һәм гуманитар өлкәләрҙә ҡатын-ҡыҙ роленең мөһим булыуын күтәреп сыҡты.
Был сара уңайынан Өфөнөң Конгресс-холл бинаһында Мәҙәниәт ми­нистр­лығы һәм Башҡортостан Ҡа­тын-ҡыҙҙар союзы “Тыныслыҡҡа һәм прогресҡа” тип аталған “түңәрәк өҫтәл” үткәрҙе, Санкт-Петербург менән телекүпер аша бәйләнешкә инеп, эшлекле тәҡдимдәр индерҙе. Өфө мәктәптәре уҡыусылары донъяуи форумда ҡатнашыусыларға шиғыр уҡыны, йыр һәм бейеү аша бала саҡ рухын еткерҙе.
Өфөлә сараға килеүселәр алдында Башҡортостан Дәүләт Йыйылышы – Ҡоролтай Рәйесе урын­ба­- ­ҫары Йомабикә Ильясова ҡатын-ҡыҙҙың был донъяла тотҡан урыны хаҡында һөйләне. Йыйында шулай уҡ мәҙәниәт министры Әминә Шафиҡова, хеҙмәт һәм социаль яҡлау министры Ленара Иванова, республиканың күренекле ҡатын-ҡыҙҙары сығыш яһаны. Башҡор­тос­тандың халыҡ артисы Флүрә Кил­­­де­йәрова гүзәл затты йыры ме­нән сәләмләне, ә шағирәләр Зөлфиә Ханнанова, Гөлназ Ҡотоева, Лариса Абдуллина шиғри сәләмдәре менән тәбрикләне. Сәсәниә Розалия Солтангәрәева майҙанға бағышлап ҡобайыр әйтте.
— Беҙ, ҡатын-ҡыҙҙар, балала­рыбыҙ тыныслыҡта йәшәһен өсөн бар көсөбөҙҙө тупларға тейешбеҙ. Республикабыҙҙа милләт-ара һәм конфессия-ара татыулыҡты һаҡлау һәм нығытыу буйынса бик ҙур тәж­рибә тупланған, уның менән уртаҡ­лашҡыбыҙ килә. Үҙебеҙҙең тәжри­бә­­- не тотош планета кимәленә күтәрер инек! Шуға күрә киләһе форумды Башҡортостанда, Өфөлә үткәреү тәҡдимен еткерәм, хөрмәтле Валентина Ивановна! – тип теләген бел­дерҙе Башҡортостан Ҡатын-ҡыҙҙар союзы рәйесе Рәшиҙә Солтанова.
Көтәбеҙ, донъяуи сараларҙы ҡабул итеп өйрәнгән баш ҡала­быҙҙың һәр яҡлап бүлешер фәһеме, фекере бар.