“Берҙәм Рәсәй” партияһының төбәк бүлексәһе тарафынан тормошҡа ашырылған “Реаль эштәр” проекты республикабыҙҙың төньяҡ-көнбайышындағы ҡала һәм райондарҙа ла уңышлы дауам итә: юлдар, спорт майҙансыҡтары төҙөкләндерелә, социаль объекттар, һыу үткәргестәр, урам яҡтыртыу ҡорамалдары йүнәтелә.

Һуңғы өс айҙа Яңауыл райо­нында ла халыҡсан проектҡа ярашлы байтаҡ файҙалы эш башҡарылды. Мәҫәлән, ҡалала — дүрт, ауылдарҙа алты уйын һәм спорт майҙансыҡтары яңыртылды. Махсус ҡоролмаларҙы һатып алыуға һәм хәүефһеҙлек ҡағиҙәләренә яраш­лы урынлаштырыуға республика бюджетынан бер миллион һумдан ашыу аҡса тотонолдо.
“Реаль эштәр” проекты райондың Вәрәш һәм Сибәҙе ауылдарындағы һыу үткәргестәрҙең иҫкергән өлөштә­рен яңыртырға, Ҡармандағыһын төҙөк­ләндерергә ярҙам итте. Яңы уҡыу йылы башланыуға Ҡаймашабаш һәм Шүдек ауылдарындағы мәктәптәрҙә, Орловкалағы “Миләшкәй” балалар баҡ­саһында, шулай уҡ Йөгәмештә һәм Истәктәге мәҙәниәт усаҡтарында тәҙрә блоктары яңыртылды. Үрге Барабановка ауылында клуб түбәһе ҡайтанан ябылһа, Ахтиялда күңел асыу үҙәгенең ихатаһы рәшәткәләнде.
Проектҡа нигеҙләнеп башҡарылған эштәрҙә күп биләмәләрҙә йәшәүселәр­ҙең үҙҙәренең дә әүҙем ҡатнашыуы ҡыуаныслы. Аҡылбай ауылы халҡы клуб биләмәһен ҡойма менән уратыу­ҙың уртаһында булһа, ҡыҙылъярҙар ауылдарының йәшел зонаһын кәртәләп алды.
Тиҙҙән килеп етәсәк көҙгө ҡараң­ғы­лыҡ Киҫәкҡайын ауыл Советы билә­мәһендәге Бәҙрәш разъезы ауылы һәм Первомайский ауыл Советына ҡараған Сусаҙы-Ябалаҡта йәшәүселәр өсөн әллә ни ҡыйынлыҡ тыуҙырмаясаҡ – бындағы урамдарҙы яҡтыртыу ҡорамалдары тулыһынса яңыртылды.
Һаналған эштәр — проект башлан­ғанда һайлаусыларҙан йыйылған 25 на­каздың тулыһынса үтәлеүе һөҙөм­тәһе. Районда йәшәүселәрҙең теләктә­рен тормошҡа ашырыу өсөн 3,3 мил­лион һумдан ашыу аҡса тотонолһа, шуның 2,6 миллионы республика бюджетынан бүленгән.
Партияның төбәк бүлексәһе башланғысы Краснокама ра­йонының Яңы Аҡтанышбаш ауыл халҡына ла оло ҡыуаныс алып килде. Бында үҙенең тәмле, таҙа һыуын ке­шеләргә йөҙ йылдан артыҡ өләшкән шишмә һәм уның янындағы барыһы­ның да яратҡан ял итеү, күңел асыу урыны булған майҙан төҙөкләнде­релде. Инеште хәҙер танырлыҡ та түгел: ул заманса материалдар менән кәртәләп алынған, ер ҡуйынынан ағып сыҡҡан тәңгәленә махсус ҡапҡасы булған ҙур диаметрлы торба ултыр­тыл­ған, һыу алыу урынына япма ҡоролған. Эштәрҙең тамамланыуы айҡанлы яңыртылған шишмәне асыу тантанаһы булды. Төрлө быуын вәкил­дәре һәм ҡунаҡтар ҡатнашҡан рәсми өлөштән һуң халҡыбыҙҙың “Киленгә һыу юлы күрһәтеү” йолаһын сағыл­дырған фольклор байрамы үткәрелде.
—“Реаль эштәр” проекты шишмәне төҙөкләндереп, уның тирә-яғын матур­ларға ярҙам итте. Бер быуаттан ашыу саф һыуы менән ҡыуандырған инеше­беҙ тағы күп йылдар кешеләргә хеҙмәт итәсәк, барыһын да үҙенә әйҙәп тора­саҡ. Был – беҙҙең өсөн иҫтәлекле ваҡиға, — тип ауылдаштарының уртаҡ шатлығын белдерҙе хеҙмәт ветераны Рәйсә Ҡәйүмова.