Башҡортостан мосолмандарының Диниә назараты рәйесе мөфтөй Нурмөхәмәт хәҙрәт НИҒМӘТУЛЛИН:

– Әс-сәләмү-ғәләй­күм үә рәхмәтул-лаһи үә бәрәкәтүһ, хөрмәт­ле мосолман ҡәрҙәш­тәр! Бөгөн – изге зөл­хизә айының туғы­ҙынсы Ғәрәфә көнө. Иртәгә мосолман­дар­ҙың иң ҙур байрамын – Ҡорбан ғәйетен – ҡаршы­лайбыҙ. Ул өс көн дауам итәсәк. Ибраһим ғәләйһис-сә­ләм ваҡытынан беҙҙең көндәргә тиклем ки­леп еткән бөйөк байрам менән барығыҙҙы ла ихлас күңелдән тәбрикләйем.
“Раббыңдың ризалығы өсөн намаҙ уҡы һәм ҡорбан сал!” – тиелгән изге “Ҡөрьән Кәрим”­дә. Әл-хәмдү лил-ләһ, был ғәмәлдәрҙе үтәгәндәр йылдан-йыл арта бара, мосолман ҡәрҙәш­тәребеҙ күпләп иман юлына баҫа.
Аллаһтың ризалығын өмөт итеп ҡорбан салыу зөл­хи­зә айының 10-сы, 11-се, 12-се көндәрендә башҡарыла. Был ғәмәл Хаҡ Тәғәләнең биргән ниғмәттәренә шөкөр итеү, фәҡир­ҙәргә ярҙам ҡулы һуҙыу, Раббыбыҙҙан гонаһ­тар­ҙы юйыуын, һаулыҡ, бәрә­кәт бире­үен һорау ниәтендә ат­ҡа­рыла. Изге ғәйет көндә­рендә игелек­тәребеҙ ишәйә, иманыбыҙ яңы­ра, күңелдә мәр­хәмәт, килер көнгә ышаныс арта. Хаҡ Тәғәләнең бар­лы­ғына һәм берлегенә ина­ныу­ҙы, йо­март­лыҡты сағыл­дырған Ҡорбан хаҡында пәйғәмбәре­беҙ Мөхәммәт ғә­ләйһис-сәләмдең бихисап хәҙи­се бар. Байрамда мосолмандар мәжлестәр уҙ­ғара, бүләктәр бирешә. Туған­дар, яҡындар менән күрешеү тор­мошҡа ҙур бәрәкәт өҫтәй. Ҡорбан салдырған ғаиләгә килгән сауаптың иһә иҫәбе-хисабы юҡ. Йортҡа иман нуры инә, ул өйҙә генә түгел, күңелдәрҙә тамырлана, шул уҡ ваҡытта доға мәрхүм­дәрҙең рухын яҡтырта.
Мөбәрәк зөлхизә айы – хаж ҡылыу мәле. Белеүегеҙсә, был ғәмәл – Ис­лам­дың бишенсе терәге. Аллаһ Тәғә­лә беҙгә әлеге ғәмәлде фарыз иткән икән, унда, тимәк, бөйөк хикмәт ята. Изге сә­фәр әҙәм балаһын һәр яҡлап тәрбиәләй. Раббыбыҙ­ҙың рәх­мәтен өмөт итеп, хаж ғибәҙәтен үтәгән кеше гүйә ки яңы тыуған шикелле гонаһ­тан паклана, уның күңеле, рухы яҡтыра. Элек был ғә­мәл­де атҡарып ҡайт­ҡандар­ҙың күбеһе халыҡтың яҡын кәңәшсеһе­нә, фекер биреүсе­һе­нә, рухи етәксе­һенә әйлән­гән, ғилем тарата башлаған, иман йорттары төҙөгән. Хәҙерге хажиҙарыбыҙ ҙа ата-бабабыҙҙың изге юлын дауам итһен, халҡыбыҙ, миллә­тебеҙ, теле­беҙ мәнфәғә­тен­дә хеҙмәт күрһәтһен, Аллаһ уларҙың сәфәренә еңеллек бирһен, ҡылған ғәмәлдәрен ҡабул ҡылһын, Ватанына һау-сәләмәт ҡайтырға насип әйләһен, иншаллаһ.
“Мосолман башҡа ҡәрҙә­шенә тел менән дә, ҡул көсө аша ла зыян килтермәҫ”, – тиелгән изге “Ҡөрьән Кә­рим”дә. Ул мәрхәмәт­лелеге, шәф­ҡәт­лелеге менән айырылып тора, ризығынан фәҡир­ҙәргә өлөш сығара, яҡ­шы кәңәш-фекере илә эргә-тирә­һендәгеләрҙең күңелен үҫте­реп йәшәй. Иншаллаһ, ошо күркәм сифаттар Ҡор­бан ғәйетендә тағы ла арт­һын, йөҙҙәрҙәге иман нуры са­ғыуыраҡ балҡыһын, хөр­мәт­­ле ҡәрҙәштәр! Аллаһ Тә­ғәлә бер-беребеҙҙең ҡәҙе­рен белеп, күркәм һүҙ-теләк аша йөрәк­тәргә дәрт, ышаныс өҫтәп йәшәргә насип ҡылһын. Донъябыҙ имен, аралағы мө­нә­сәбәттәребеҙ татыу, көн­дәребеҙ тыныс булһын. Ҡор­бан ғәйете мөбәрәк кил­һен, артабанғы байрамдарҙы ла ҡыуаныс-шатлыҡ менән ҡаршы алайыҡ, иншаллаһ! Әс-сәләмү-ғәләйкүм үә рәхмә­тул-лаһи үә бәрәкәтүһ! Амин.