Райондың ауыл хужалығы һәм крәҫтиән (фермер) хужалыҡтарында ҡыҙыу осор — үҫтерелгән уңышты урып йыйыу эше киң ҡолас менән бара. Агросәнәғәт комплексында мөһим урын биләгән ҡеүәтле предприятие — “Урал аръяғы-Агро” МТС-ының Баймаҡ филиалы баҫыуҙарында эш ҡайнай.

Әйтергә кәрәк, быйыл предприя­тиеның үҫемлекселек тармағы үҙенең яҡшы төшөмө, тәрбиәле баҫыуҙары менән ҡыуандыра. Быны районға рәс­ми эш сәфәре барышында Башҡорт­остан Хөкүмәте Премьер-министры урынбаҫары И. Тимерғәлин дә, респуб­лика ауыл хужалығы министры Н. Коваленко ла билдәләгәйне. Тәбиғи, шундай ҡеүәтле техника пар­кы һәм уңдырышлы ерҙәргә эйә булған предприятиела һөҙөмтәләр ҙә яҡшы булырға тейеш. Һуңғы йылдар­ҙа МТС уңыш менән маҡтана алмаһа, быйыл иһә хәл яҡшы.
Предприятие директорының произ­водство буйынса урынбаҫары А. Әх­мәтшин менән Аҡташ баҫыуы ста­нында осраштыҡ. Азат Ишбулды улы — тәжрибәле белгес, оҙаҡ йылдар данлыҡлы “Йылайыр” ауыл хужалығы предприятиеһында баш агроном булып эшләгән, унан “Урал аръяғы” МТС-ы Баймаҡ филиалының Йылайыр бүлексәһендә агрономия хеҙмәтен етәкләгән. Үҫемлекселек тармағындағы бай тәжрибәһе уға яҡшы һөҙөмтәләргә өлгәшергә мөмкинлек бирә.
Аҡташта баҫыуҙарҙан иген ҡабул ителә, таҙартыла, ошонда уҡ комбайнсылар өсөн дөйөм ятаҡ урын­лаш­ҡан, унда бөтөн шарттар тыу­ҙы­рылған. Мунсаһы ла бар. Баш агроном, белгестәр һәм хеҙмәткәрҙәр менән кәңәшмә үткәреп, аныҡ маҡ­саттар билдәләне лә беҙҙе пред­прия­тиеның икһеҙ-сикһеҙ баҫыу­ҙа­рына алып китте. “Икһеҙ-сикһеҙ” тип әйтеү юҡҡа түгел, сөнки бөгөн МТС ҡарамағындағы баҫыуҙар бөтәһе 12115 гектар тәшкил итә. Уларҙа бойҙайҙың ҡаты һәм йомшаҡ сорттары, арпа, һоло үҫтерелә.
Әйтергә кәрәк, предприятие баҫыу­ҙарында гөрләп торған эш беҙгә элек­ке осорҙо хәтерләтеп яҡшы тойғолар ҡалдырҙы. Ураҡ кампанияһы барған ҡайһы ғына биләмәгә барып туҡтама, иген­селәрҙең көр кәйефе, эшкә мө­киб­бән бирелеүе, уртаҡ маҡсат ҡу­йыуы һоҡландырҙы. Әле игенселәр 1300 гектарҙа һолоно урып һуғыуҙы тамамлап, көстө бойҙай һәм арпа йыйыуға йүнәлткән. МТС-тың Күлта­бан бүлексәһе баҫыуҙарында биш берәмек “Кейс”, дүрт “Дон-1500”, өс “Нью-Холланд” эшләй. Йылайыр бүлексәһендә иһә ураҡ эштәренә дүрт “Кейс”, ете “Челленджер” комбайны йәлеп ителгән.
— Быйылғы йылдың үҙенсәлеге шунда, — ти Азат Ишбулды улы, — һуңыраҡ сәскән баҫыуҙарҙа уңыш күпкә яҡшыраҡ. Уларҙың төшөмө гектарынан 15 центнерҙан юғары, ҡайһы бер сәсеүлектәрҙә — 20-22 центнер. Айырым культураларға килгәндә, һо­ло уңышы гектарынан 9,5 центнер, арпаныҡы — 16, йомшаҡ бойҙайҙыҡы — 14, ҡаты бойҙайҙыҡы 11 центнер тәшкил итә. 376 гектарҙа быйыл тәүләп ҡаты бойҙайҙың “безенчукская степная” элиталы сортын сәскәйнек. Ул беҙҙең өмөттәрҙе тулыһынса аҡланы: гектарынан 20-22 центнер уңыш йыйып алабыҙ. Йомшаҡ бой­ҙайҙың “альбидум” тигән сорты ла һәйбәт төшөм бирҙе — 20 центнер. Ул бөтәһе 604 гектарҙы биләй. Дөйөм алғанда, ураҡ кампанияһы ойошҡан рәүештә бара, игенселәр, иген ҡабул итеү пункттары тотороҡло эшләй. Баймаҡ филиалының Аҡташта, Урға­ҙа, Калинин ауылдарында, Хәйбулла районының Сиҙәм ауылында ырҙын табаҡтары бар, уларҙа ашлыҡ та­ҙартыла, орлоҡ һалына, тауар игене әҙерләнә. Ғөмүмән, үҫтерелгән уңышты юғалтыуһыҙ йыйып алыу өсөн мөмкин булғандың барыһы ла эшләнә.
Ысынлап та, игенселәр ал-ял бел­мәй. Комбайнсылар Фәнис Байғотлин, Сафа Халиҡов, Алик Камалетдинов, Ғәлим Ҡаҙаҡҡолов, Гәрәй Нурдәү­ләтов, Риза Фәйзуллин, Мирзаян Хәйбуллин, Әхтәм Сыңғыҙов, Хәй­булла Мырҙагилдин, Нурислам Ғүмә­ров, Айбулат Шәрәфетдинов, Илья Бахарев, водителдәр Илшат Тусалин, Венер Әхмәров, Фәнил Миңлебаев, Даян Избасаров хеҙмәт ҡаһарман­лығы күрһәтә.
Әле предприятие иген культураларын урып йыйыу эшен 70 процентҡа атҡарып сыҡҡан, ике-өс көндән Күл­табан бүлексәһе игенселәре яуаплы кампанияға нөктә ҡуясаҡ.
Ғөмүмән, данлыҡлы “Йылайыр” сов­хозы тарихта ҡалһа ла, баҫыу­ҙарҙа һулыш туҡталмай, арҙаҡлы игенселәрҙең эшен “Урал аръяғы-агро” МТС-ы, крәҫтиән (фермер) хужалыҡтары уңышлы дауам итә. Шунһыҙ мөмкин түгел — бәрәкәтле Баймаҡ ерендә бәрәкәтле иген үҫергә тейеш.