Башҡортостан телевидениеһының тапшырыуҙарын тәүге сығарылыштарынан алып ҡарап киләм. Халҡыбыҙҙың үткәнен, бөгөнгөһөн һәм киләсәген яҡтыртыу һәр саҡ уның төп темалары булып торҙо.


Әле лә үҙәк телевидение каналдарынан һәр төрлө детектив фильмдар, атыш-үлтереште, суд һәм полиция органдарының эшендәге ыҙғыш­тарын ҡарап ялҡҡанлыҡтан, күберәк үҙебеҙҙең тапшырыуҙарҙы ҡара­йым. Телевидение хеҙмәт­кәрҙәре тормо­шо­боҙҙағы сағыу күренештәрҙе, ваҡиға­ларҙы, айырым шәхестәрҙең эшен һәм яҙмыш­тарын тулы итеп сағылдырырға ынтыла, тормош юлыбыҙға яҡтылыҡ һибеп ҡал­дырырға тырыша.
Телевидение коллективы тәжрибәле, талантлы журналистарҙан тора, тип әйтер инем. Әле һүҙем ана шундайҙарҙың бе­реһе – Рәйсә Рәйес ҡыҙы Ҡазбулатова тураһында. Баҫалҡы, төплө белем­ле, үҙ эшенә мөкиббән бирелгән был журналист тәрән йөкмәткеле, матур-матур тапшырыу­ҙары менән ҡыуандыра беҙҙе. Үҙ күңеленә яҡын теманы һайлап ала белә, уның өҫтөндә ентекләп һәм ҙур яуаплылыҡ тойоп эшләй. Рәйсә Ҡаз­булатованың “Үткән ғүмер” серияһы буйынса алып барған тапшырыу­ҙары тамашасы күңеленә бик тә яҡын. Уны тулы мәғәнәле итеп эшләү өсөн автор күпме тормош материалын өйрәнә лә ни хәтлем кешеләр менән осрашып һөйләшә! Ә бит әле уны дөйөмләштереп, үҙеңдең фекереңде йыйнаҡ һәм аныҡ итеп әйтә белергә лә кәрәк.
Рәйсәнең әҙәбиәт һәм сәнғәт эшмә­кәр­ҙәре тураһындағы “Автограф” тапшырыу­ҙары айырым иғтибарға лайыҡ. Ул әҙәбиәт һәм сәнғәт өлкә­һендә эшләүсе шәхестәре­беҙҙең хеҙмәттәрен киләһе быуындарға тапшыра, тамашасы күңелендә матурлыҡҡа инаныу тойғолары уята. Ә был маҡсатҡа тик телевизион тапшырыуыңды бай һәм яҡты рухлы итеп ойошторғанда ғына өлгәшеп була. Рәйсә Ҡазбулатова тап ошо йүнә­лештә эшләй һәм яңынан-яңы уңыштарға өлгәшә.