Был ғаиләне Балтаста белмәгән кеше һирәктер. “Моңға бай гармун” конкурсы лауреаты Наил Хафиз улы — район мәҙәниәт һарайы янындағы тальянсыларҙың “Моң” халыҡ ансамблен ойоштороусы ла, уның етәксеһе лә.

Яңы Штәнде ауылында тыуып үҫкән Наил бәләкәйҙән йыр-моңдо үҙ иткән. Атаһы Хафиз ағай, һарыҡ һатып, улына бәләкәй генә гармун алып бирә. Шунан башлана ла инде малайҙың моңға сорналған тормошо.
Кистәрен үҙенән күпкә өлкән ауылдаш ағай-апайҙарын йыйып бейе­теүсе, йырлатыусы, ғаилә байрам­- дарын музыкаль яҡтан биҙәүсе, ар­мия хеҙмәтенә юлланған ағай­ҙарын моңло көйҙәр менән хәйерле юл теләп оҙатыусы ла Наил була. Инде урта мәктәпте тамамлағанда егеттең алдында “Киләсәктә кем булырға?” тигән һорау тормай. Ике лә уйламай, Стәрлетамаҡ ҡалаһындағы мәҙәни-мәғрифәт техникумының ха­лыҡ уйын ҡоралдары бүлегенә уҡырға инә. Аҡыллы, сабыр, тыйнаҡ егет буласаҡ ҡатынын да белем алған йылдарында осрата. Иҫке Балтас ауылы ҡыҙы Зөһрә Наилен армияға оҙата, көтөп ала.
Наил Хафиз улы уҡыуын хәрби хеҙмәттән һуң тамамлай, баян буйынса махсуслашып, халыҡ музыка ҡоралдары ансамбле етәксеһе һөнә­рен ала. Йәштәр ғаилә ҡора һәм төр­лө уйҙарға бирелмәй, тыуған тө­бәк- ­тәренә эшкә ҡайта. Район мәҙәниәт һарайында Наил баянсы, ҡатыны бейеүсе, методист булып оҙаҡ йылдар дауамында хеҙмәт итә. Мәҙәниәт һарайының методика кабинеты мөдире була Зөһрә Рәхимйән ҡыҙы. Оҙаҡ йылдар дауамындағы өлгөлө эшмәкәрлеге өсөн “Хеҙмәт ветераны” исемен лайыҡлы йөрөтә ул бөгөн.
Бер ҡаҙанға ике тәкә башы һый­май, тиҙәр. Ғәлләмовтарға ҡағылмай был.
— Бер-беребеҙҙе аңлап йәшәүе­беҙ күп һынауҙарҙан һаҡлағандыр, тимен, — ти Зөһрә ханым.
Берҙән-бер улдары Айҙар ҙа сәнғәт, моң илен үҙ иткән. Стәр­летамаҡ мәҙәни-мәғрифәт технику­мының бейеү бүлеген тамамлаған, тыуған районында “Гүзәл” халыҡ бейеү ансамбленә етәкселек иткән.
Айҙарҙың кәләше Гөлназ Әхтәм ҡыҙы — Ишембай районының Кинйә­булат ауылы һылыуы. Уҡыған йылдарында ғаилә ҡорғандар. Хәҙер өс са­бый тәрбиәләйҙәр. Эмиль менән Да­нил — мәктәп уҡыусылары, Аль­би­­наға дүрт йәш. Гөлназ Әхтәм ҡыҙы — бар булмышы менән мәҙә­ниәткә, сән­ғәткә бирелгән ханым. Район мә­ҙә­ниәт һарайы ҡарама­ғындағы бала­- ­лар­ҙың “Гөрләүек” өлгөлө бейеү ан­самбленә етәкселек итә. Байрам уңа­йынан ойошторолған концерт про- ­грам­маларында ҡабат­ланмаҫ бейеү­ҙәре менән тамашасыны һоҡлан­дыра.
Концерт программаларын, башҡа тантаналарҙы урыҫ һәм башҡорт телдәрендә алып барыусы сифатында ла һынатҡаны юҡ Гөлназ Әх­тәм ҡыҙының. Ә уның етәкселе­­ген- дәге бәләкәй бейеүселәр ансамбле район, республика бәйге­лә­рендә лә уңышлы сығышы менән һөйөндөрә. Бейеү сәнғәтенә тартылған сабый­ҙарҙы матурлыҡҡа, тәртипкә, йый­наҡлыҡҡа, коллективта эшләргә өйрәтеү етәксенән күпме көс сарыф иткәнлеген күҙ алдына килтереүе ҡыйын түгел.
Өлкән Ғәлләмовтарҙан башланған моң шишмәһе бөгөн инде тағы ла артып, яңырып, урғылып аға. Улар­ҙың бынамын тигән ғаилә ансамб­лдәре бар. Наил Хафиз улы, Айҙар Наил улы, Эмиль Айҙар улы — баянда, Зөһрә Рәхимйән ҡыҙы — бубенда, Гөлназ Әхтәм ҡыҙы — ҡумыҙ­ҙа, Данил Айҙар улы өсмө­йөшлө һуҡма ҡоралда халыҡ көйҙә­ренә теҙмәне уйнап ебәрһә, залда илаһи тынлыҡ урынлаша.
Эмиль, сәнғәт мәктәбенең баян кла­сын уңышлы тамамлаһа ла, олатаһы етәкселек иткән ансамблдә уйнай. Бәләкәй Альбина ла бик дәрт­ле. Үҫә төшкәс, бәлки, уның да һәләте асылыр һәм Ғәлләмовтарҙың ғаилә ансамбленә ҡабатланмаҫ биҙәк өҫтәр.
Ир кешенең аҡылы, ҡатын-ҡыҙҙың сабырлығы ғаиләне күркәм, ғүмерле итә. Район хакимиәтенең мәҙәниәт бүлегендә ҡулға-ҡул тотоноп эшләгән хеҙмәттәштәре ғаилә башлығы Наил Хафиз улы хаҡында бик дөрөҫ әйтә:
— Ниндәй генә сара үткәрелеүгә ҡарамаҫтан, тәүлектең ҡайһы сәғә­тендә мәҙәниәт һарайына инһәк тә, Наил Хафиз улы иңенә баянын аҫып, сараның уртаһында ҡайнай. Элек: “Был кешенең шәхси донъяһы бармы, өйөнә ҡайта аламы икән?” — тип уйлай инек. Һоҡланғыс сифат биҙәй уны: ысын профессионал була­раҡ, вәғәҙә иткәнен мотлаҡ үтәй. Кү­ңе­ле менән ошо өлкә кешеһе булғас, юғалып та ҡалмай, башҡа­ларҙы ла ҡабатламай, Балтас еренең Наил Ғәлләмовы булып ҡала.