Башҡортостан Башлығы Рөстәм Хәмитов Республика йортонда Рәсәй Фәндәр академияһы академигы, иҡтисад фәндәре докторы, профессор, Фәндәр академияһының Урал бүлексәһендәге Иҡтисад институты директоры Александр Татаркин менән осрашты. Сарала республиканың социаль-иҡтисади үҫеше мәсьәләләре тикшерелде.

— Быйыл һигеҙ ай эсендә сәнәғәт етештереүе индексы 100,5 процент тәшкил иткән. Һалым буйынса ла 14 процентлыҡ үҫеш күҙәтелә. Ләкин был — һумдың девальвацияһы һөҙөмтәһе. Экспортерҙарыбыҙ ярайһы уҡ ҙур табыш ала, шуға ла һалым арта. Инвестиция эшмәкәрлегендә әүҙемлек бар, — тине Рөстәм Хәмитов.
Төбәк етәксеһе әйтеүенсә, ҡайһы бер күрһәткестәр түбәнәйгән. Мәҫәлән, нефть эшкәртеү күләме — 15-16, ваҡ сауҙа — 12-13, күмәртәләп сауҙа итеү — 15, йөк ташыу 7-8 процентҡа кәмегән. Ауыл хужалығына килгәндә, йыл аҙағына һөт етештереүҙең артыуы көтөлә.
— 2015 йылдың былтырғыға ҡарағанда яҡшыраҡ булыуы күҙаллана. Һөт буйынса Татарстан менән беҙ алдынғылыҡты бирмәйбеҙ, — тине Рөстәм Хәмитов. — Бөгөн ауыл хужалығындағы продукцияның — картуф, йәшелсә, һөт, иттең — 60 процентын шәхси ярҙамсы хужалыҡтар етештерә. Был беҙҙең өсөн ҡулай түгел. “Индустриаль йүнәлеш”кә күсергә кәрәк.
Республика Башлығының фекеренсә, уйланылған, уңайлы инвестиция шарттары был мәсьәләне хәл итеү мөмкинлеген бирәсәк.