Төбәк етәксеһе етештереүселәргә шундай талап ҡуйҙы
Республика Башлығы Рөстәм Хәмитов Өфө районының Авдон ауылына барып “Башҡортостан” ҡошсолоҡ фабрикаһын яңыртыу барышы менән танышты.

Әле 20 бинала реконструкция та­мамланған, улар заманса ҡора­мал­дар, елләтеү системалары менән йы­һазландырылған. Проект буйынса инвестицияларҙың дөйөм күләме 700 миллион һум самаһы тәшкил итә. Рес­публика Хөкүмәте күрһәткән яр­ҙам 70 миллион һумдан ашып киткән. Реконструкция һөҙөмтәһендә һалым бүлемдәре йылына 55,8 миллион һум­дан 95,5 миллион һумғаса артҡан.
Рөстәм Хәмитов предприятие хеҙ­мәткәрҙәре менән аралашты, “Авдон” сауҙа маркаһы менән сыҡҡан продукция күргәҙмәһен ҡараны. “Русское Зерно Өфө” яуаплылығы сикләнгән йәмғиәтенең генераль директоры Ста­нислав Насимов республика етәксеһен холдинг предприятиеларында ит етештереү линияларын яңыр­тыу буйынса өр-яңы проект менән таныштырҙы. Күҙалланған инвестиция күләме 4,8 миллиард һум тәшкил итә.
Холдинг етәксеһе менән әңгәмәлә тө­бәк Башлығы ҡошсолоҡ фабрика­ла­рындағы ҡалдыҡты эшкәртеү мәсь­ә­ләһен күтәрҙе һәм Ауыл хужалығы ми­нистрлығына ошо бурысты тор­мошҡа ашырыуҙың төрлө юлдарын тикшерергә, шул иҫәптән пред­приятиеларҙы субсидиялау мөмкин­леген ҡарарға ҡушты.
– Беҙҙең өсөн нимә мөһим: тирә-яҡтың именлеге һәм етештереүҙең таҙалығымы, әллә шартлы рәүештә экономияланған 20 миллион һуммы? Яуабы билдәле инде. Предприятие мәҙәни йәһәттән дә алда барырға тейеш, – тине Рөстәм Зәки улы.