Элекке колхоздың йәшелсә үҫтергән баҫыуында бер трактор геүләй. Фермер Әнүр Шаһиевтың «тимер аты» ул. Булдыҡлы уҙаман баҫыуын көҙгө сәсеүгә әҙерләй.


…Оҙаҡ ваҡыт етәксе вази­фаларҙа эшләгән­дән һуң, 2006 йылда Әнүр Әҙһәм улы фер­мер­лыҡҡа тотона. Ауыл хужалығын биш бар­ма­ғын­дай белгән егет эшсе ҡулдар етешмәүгә аптырап ҡалмай – кабинеттан трактор кабина­һына күсеп ултырыуына хат­та ҡыуанып та ҡуя. Баҫыуҙан мотор геүләтеп китеп барыу бәхет түгелме ни?!
Беҙҙе ҡаршы алғанда ла «МТЗ-82» трак­торының рулендә фермер нәҡ үҙе ине. Тырмаға төшкән икән.
— Эш етерлек: туңға һө­рә­һе бар, көҙгө сәсеү көтә, бына әле орлоҡ индерергә ер әҙерләйем, — тип таныштыра Әнүр Шаһиев тауыҡ сүпләһә лә бөтмәҫ мәшә­ҡәттәре менән.
Сәсеү тигәндән, был эште фермер 64 гектар майҙанда башҡара: бойҙай, арыш ултырта. Ер­ҙе үҙе эшкәртә, уңышты йәнә үҙ комбайнында һуға. Әлбиттә, бер үк ваҡытта тракторҙа ла, комбайн штурвалында ла ултырып булмай. Ҡыҙыу мәлдә фермер Шаһиевта бер нисә егет эш уры­ны таба, техникалары менән башҡалар ҙа яр­ҙамға килә. Шулай ҙа, беҙгә ҡалһа, төп таянысы – ҡатыны Фәнирә менән ҡыҙҙа­рылыр. Ниндәй генә ҙур маҡ­сат ҡуйма, яҡында­рың­дың йылы һүҙе булмаһа, уңыш­тарға өлгәшеү — ай-һай!..
Шуныһы иғтибарға лайыҡ: Шаһиев һәр ва­ҡыт тармағын киңәйтеү, үҫтереү һәм яңы­лыҡ­тар өйрәнеү өҫтөндә. Мәҫәлән, ауылда һәр йүн­сел ташландыҡ баҡсаларға картуф сәсмәй әле. Умарта тотоу, ҡышын мунса мейес­тәре яһау ҙа ят түгел Әнүр Әҙһәм улына. Ә ауылда кемгә ҡом, кемгә бесән кил­тер­мәгән икән булдыҡлы егет?!
— Иген сәсеү менән бер рәт­тән, мал үрсетеүгә лә иғтибар бирергә тырышабыҙ, башлыса иткә тапшырабыҙ. Әле 40-ҡа яҡын баш һыйыр малы бар, 20-нән ашыу ат тотабыҙ, 30-ҙан артыҡ ҡуй аҫрайбыҙ, — ти табышының мул өлөшө хаҡында Әнүр Шаһиев.
Эйе, ауыл кешеһе бер эшкә генә өҫтөнлөк бирә алмай шул. Бесән уңмаһа, картуф уңа, тигәндәй, бар яҡлап та инвестиция һалыр­ға тура килә уға.
Ул арала фермер, баҫыу­ҙағы бөгөнгө эшен тамамлап, өйөнә ашыҡты:
— Ғәфү итегеҙ, егеттәр, ямғыр яумаҫ борон бәрәң­генең өҫтөн сабаһы ине, — тигәс, ер кешеһен башҡаса тотҡарлап торорға хаҡыбыҙ юҡлығына инанып, үҙ юлы­быҙҙа булдыҡ.