Төбәк етәксеһе Рөстәм Хәмитов эш сәфәре менән Бөрөлә булды һәм ҡалалағы етештереү, инфраструктура объекттарын ҡарап сыҡты, киләһе йылытыу миҙгеленә әҙерлек барышын тикшерҙе.


Башта республика Башлығы “Спектр” яуаплылығы сикләнгән йәмғиәтенең эше менән танышты. Ул 2002 йылда әүәлге “Оргтехника” заводы нигеҙендә ойошторолған һәм пластмасса изделиелар етештереү менән шөғөлләнә. Предприятие про­дук­цияһына “Совтехстром” сауҙа мар­каһы менән сығарылған 60-тан ашыу төрлө уйынсыҡтар, канцелярия һәм көнкүреш тауарҙары инә. Әйберҙәр Башҡортостанда ғына түгел, Рәсәйҙең башҡа төбәктәрендә лә һатыла.
“Спектр” йәмғиәтенең ойош­то­роу­сыһы Ва­дим Павлович әйтеүенсә, пред­приятие Өфө­ләге, Түбәнге Ка­малағы, Салауаттағы сей­малды аралашсы фирмалар аша һатып алырға мәжбүр. Етештереүселәр урындағы предприятиелар менән полимер һәм пластикты аҙ күләмдә һатып алыуға килешеү төҙөргә ашыҡмай. Рөстәм Хә­митов ара­лаш­сылыҡты ҡыҫҡар­тыуҙың яңы юлдарын эҙләү, предприятиела конкурентлыҡ ҡеүәһенә эйә булған яңынан-яңы технологияларҙы ғәмәлгә индереү зарурлығын билдәләне.
Башҡортостан Башлығы Күп йүнә­лешле мәҙәни үҙәк һалынған төҙөлөш май­ҙансығында ла булды. Объектта эште киләһе йыл аҙағына тиклем тамамлау күҙаллана.
Артабан Рөстәм Хәмитов “Бөрө йылылыҡ селтәрҙәре” йәмғиәтенең 5-се ҡаҙанлығына юлланды. Бында ул йылытыу миҙгеленә әҙерлек кимәлен тикшерҙе.
Предприятие директоры Андрей Тавгаев әйтеүенсә, 2011 йылда йәм­ғиәт, Чехиянан инвестициялар йәлеп итеп, дәүләт-шәхси парт­нерлыҡ алы­мы буйынса “Бөрөлә йылылыҡ менән тәьмин итеү объекттарын реконструкциялау” проектын тормошҡа ашыра баш­ла­ған. Системаны проектлау, төҙөү һәм ҡо­рамалдар менән йы­һаз­ландырыу эштәре Чехияның “Энком” йәмғиәте менән берлектә баш­ҡа­рылған. Контракттың хаҡы — 3,4 миллион евро самаһы. Ҡорамалдарҙың бер өлөшө Рәсәйҙә, атап әйткәндә, Туймазылағы ҡаҙанлыҡ ҡорамалдары заводынан һатып алынған. Система яңыртылғас, уның эш һөҙөмтәлелеге һәм ышаныслылығы бермә-бер артҡан. Өҫтәүенә, ресурстар, аҡсалата сығым да кәмегән.