Районыбыҙға килгәндәр беҙҙә ҡайындарҙың күпләп ҡороғанын күргәндер, моғайын. Был процесс үтә тиҙ бара. Нимә булған һуң аҡ күлдәкле һылыуҙарға?

Һорауыма яуап табырға те­ләп, Башҡортостан Урман хужа­лығы министрлығының Стәр­­ле­тамаҡ урмансылы­ғын­дағы тәжрибәле белгес-эксперт Рәшит Рәхимовҡа мөрәжәғәт иттем.
— Ҡайындың ҡороуының бер сәбәбе — бактериялы һары һыу ауырыуы, – тине ул. – Икенсеһе — ер аҫты һыуҙары кимәленең кәмеүе. Билдәле булыуынса, ҡайын ағасы япраҡтары аша 60 литр һыуҙы парға әйләндерә, көн эҫе йә елле булғанда, унан да күберәк. Ағастар йыл һайын ҡоролоҡтан, тупраҡта дым етмәүҙән зыян күрә.
Бактериялы һары һыу ауырыуы республика­быҙҙа ун йыл тирәһе элек Учалы районында барлыҡҡа килде һәм бөтөн төбәк буйлап таралды. Быға ҡаршы көрәш юлы бер генә — сирле ағастарҙы ҡырҡыу. Эште ҡышҡыһын йәки ҡоролоҡ осоронда башҡарыу яҡшы. Әле бактериялы һары һыу ауырыуының ҡоторған сағы, уны ағастарҙы ҡырҡып ҡына туҡтатырға мөмкин.
Урман хужалығы белгестәре бил­дәләүенсә, был сиргә Баш­ҡортостандағы ҡа­йын­лыҡтарҙың 30 проценты дусар булған. Нимә эшләргә һуң? Район­дағы барлыҡ урман һыҙаттары ла ауыл билә­мәләренә ҡарай, ағас­тарҙы шунда йәшәгән халыҡ тәр­биә­ләргә тейеш. Урындағы хаки- ­миәт­тәрҙән йыш ҡына ҡороған­дарын бушлай ҡыр­ҡырға рөхсәт бирелә, әммә алырға ынтылғандар юҡ тиерлек.
— Халыҡ урман һыҙаттарында утын әҙерләргә теләмәй, — ти Тәнәй ауыл хакимиәте башлығы вазифаһын ваҡытлыса башҡа­рыу­сы Анатолий Анисков. — Һөҙөмтәлә ҡайындар тамырынан ҡорой. Кешеләрҙең бушҡа алғыһы килмәй, урмансылыҡтан һатып алыуҙы хуп күрәләр.
Ә бына Покровкаға яҡын ятҡан ауылдар хал­ҡы өмәгә сыҡҡан. Әммә унда хаҡлы ялдағылар, транспорты булмағандар утын әҙер­ләй алмаған. Был эш өсөн махсуслаштырылған бригада кәрәк, тиҙәр.
Ғөмүмән, ҡайындарҙың ҡороу мәсьәләһе ифрат етди, уны республика кимәлендә тиҙ ара­ла хәл итергә кәрәк.