Был һорауға яуап табыр өсөн тәүҙә алҡа-балдаҡтарҙың нимәнән эшләнеүен асыҡлау мөһим. Шулай ҙа барлыҡ биҙәүестәргә ҡағылышлы бер нисә ҡағиҙәгә ҡолаҡ һалыу яҙыҡ булмаҫ.

Бижутерияны, ювелир әйбер­ҙәрҙе лә ҡоро, ҡараңғы урында тоталар, сөнки металл да, таштар ҙа дымды “яратмай”. Бер нисә металды бергә һалмағыҙ: көмөш менән алтын бер-береһенә кире тәьҫир итеүсән. Бижутерияны ҡиммәтле металдан айырым һаҡлағыҙ. Яһалма ташлы биҙәүестәр өсөн ағас ҡумталар бик ҡулай, шулай уҡ уларҙы мамыҡ сепрәккә төрөп ҡуйыу килешә. Юғиһә, яһалма кристалдарҙың сыйылып йә сатнап ҡуйыуы ихтимал.
Ювелир әйберҙәрҙе даими тәр­биәләп, махсус матдәләр ярҙамында таҙалап тороғоҙ. Уларҙы кейер, тағыр алдынан фланель сепрәк менән һөртөгөҙ.
Алтындан, платинанан эшләнгән биҙәүестәрҙе йомшаҡ туҡыма менән көпләнгән футлярҙа, ҡоро һәм ҡараңғы урында һаҡлау кәрәк. Был бигерәк тә юғары келәймәле әйберҙәр өсөн мөһим. Алтынды ҡатырға ҡумтала тоторға ярамай, сөнки көкөрт менән бәйләнешкә инеп, биҙәүес ҡара төҫ аласаҡ. Шулай уҡ пластик һауыт ҡулланыу кәңәш ителмәй.
Көмөштө бик ҡараңғы, ҡоро ергә һалығыҙ. Бындай биҙәүестәр ағас ҡумталарҙы бөтөнләй ярат­май, ә бына поли­эти­ленға бик ыңғай ҡарашта. Йәғни көмөштө ошо материалдан эшләнгән тоҡ­сайҙа һаҡлау килешә, һәм ул ҡараймаһын өсөн эргәһенә күмер киҫәген һалығыҙ. Һуңғыһы артыҡ дымды үҙенә һеңдерер.
Ынйыны һаҡлауҙың да ҡағиҙәләре бар. Бе­ренсенән, уны көпләнгән махсус һауытҡа йә булмаһа йомшаҡ туҡымаға төрөп һалалар. Бындай биҙәүестәр ҡояшты яратмай. Таҙартыу өсөн саҡ ҡына дымланған салфетка ҡулланыла.
Ҡиммәтле ташлы биҙәүестәрҙе айырым бүлектәре булған ҡумтала һаҡлау килешә. Көнкүреш химияһын ҡулланып эшләгәндә уларҙы сисеп тороғоҙ, юғиһә “ауырый” баш­лаясаҡтар. Йылына 2 – 3 тапҡыр ювелирҙан таҙарттырыу ҙа мөһим.