Райондың һабантуй майҙаны гөрләп тора. Халыҡ байтаҡ. Йыл һайын республика кимәлендә ойошторолған “Урман ҡырҡыусы” бәйгеһенең быйыл тап ошо ерҙә үткәрелеүе юҡҡа түгел: Ҡариҙел күптән урман сәнәғәте буйынса Башҡортостанда алдынғылыҡты бирмәй. Ағас эшкәртеү менән бында утыҙҙан ашыу ойошма шөғөлләнә, улар йылына 88 мең кубометр материал етештерә. Был күрһәткес һуңғы йылдарҙа өс тапҡырға артҡан.
Дәүләт эшсе һөнәрҙәренең абруйын арттырыу мәсьәләһен иғтибар үҙәгендә тота. Әлеге бәйге Башҡортостандың урман сәнәғәтселәре ассоциацияһы һәм Ҡариҙел районы хакимиәте тарафынан тап ошо маҡ­сат­та Башҡортостан Хөкүмәте, республиканың Сә­нәғәт һәм инновация сәйәсәте, Урман хужа­лығы министрлыҡтары ярҙамында ойош­торолған.
Ике көн барған сарала иң оҫта урман ҡырҡыусылар ағас йығыу, бысҡы менән эш итеү, бүрәнәне тейешле үлсәмгә тап килтереп бысыу, ботау кеүек ярыш төрҙәрендә үҙен һынаны. Чемпионатҡа Өфө урман хужалығы техникумынан, “Башҡортостан урман сәнәғәте компанияһы”, “Селена” яуаплылығы сикләнгән йәмғиәттәренән, Әмзә урман хужалығынан, Нуриман, Ҡариҙел урмансылыҡтарынан командалар килгәйне. Беренсе көндө улар ағас бысыу оҫталығын күрһәтте. Был ярышта урман ҡырҡыусы ни бары өс минут эсендә ағасты бөтөн хәүефһеҙлек сараларын күреп йығырға тейеш. Беренсе конкурс уҡ һәр команданың етди әҙерләнгәнлеген күрһәтте, тип билдәләне белгестәр.
Былтырғы бәйгенең еңеүсеһе Әмзә урман хужалығы вәкиле Николай Калинин ағас ҡырҡыусы булып 22 йыл эшләй.
– Ысынлап та, әлеге бәйгелә әйтелеүенсә, йәштәр был һөнәргә килмәй тиерлек. Минеңсә, нәҡ ошондай саралар кешелә тармаҡҡа ҡарата ҡыҙыҡһыныу уята. Беҙҙең эште ҡарап торған малайҙар һуңынан эргәгә килеп һорауҙар яуҙырҙы. Шуныһы мөһим дә инде. Көнөнә 150 кубометр ағас киҫәм. Һөнәрем оҡшай. Урман гел яңырып торорға тейеш тип һанайым. Иң яратҡан шөғөлөм иһә – ағас ултыртыу, – тип һөйләне Николай Валерьевич. Әйткәндәй, ул былтыр Киров ҡалаһында үткән дөйөм Рәсәй бәйгеһендә ҡатнашып, беренселекте алған. Әлеге бәйгелә бысҡыны ҡороу буйынса рекорд ҡуйҙы – 16 секундта ҡоралы эшкә әҙер ине.
Бәйгелә беренсе урынды быйыл да Нефтекама ҡалаһының Әмзә урман хужалығы алды, икенсе урынға Ҡариҙел районының урман эшкәр­теү­селәр союзы сыҡты, өсөнсө урында – “Башҡортостан урман сәнәғәте компанияһы”. Еңеүселәр сентябрҙә Ҡазан ҡалаһында үтәсәк Рәсәй чемпионатында ҡатнашасаҡ.
Белорет урмансылығында эшлә­гән Марат ағай Сафуанов менән ярыш алдынан бер аҙ һөйләшеп өлгөрҙөк.
– Урман ҡырҡыусы һөнәрен үҙләш­тергәнемә – өс йыл. Быға тиклем кранда эшләнем. Әлеге бригадабыҙ өс кешенән тора: минән тыш, Дамир Хажин, Рәмил Бикбулатов. Егеттәр ышаныслы. Нисек кенә булмаһын, урманға сыҡҡанда татыу йөрөргә, бер-береңде аңлап эш итергә кәрәк. Беҙ унар тәүлек ҡайтмай эшләйбеҙ, көнөн-төнөн урманда үткәрәбеҙ. Тәбиғәт менән аралашыу ҙа, эшем дә оҡшай, – ти Марат ағай.
Чемпионат ағас эшкәртеүсе ойош­маларға тәжрибә уртаҡлашыу, тар­маҡтағы үҙгәрештәр менән танышыу, яңы продукция күргәҙмәһен ҡарау мөмкинлеген бирҙе.

Арыҫлан МЫРҘАГИЛДИН, “Нуриман урмансы­лығы” дәүләт бюджет учреждениеһы етәксеһе:
– Илдең урман хужалығы үҙгәртеп ҡороу заманынан һуң бөлгөнлөккә төшкәйне. Ваҡытында үткәрелгән реформалар уның аяҡҡа баҫыуына булышлыҡ итте. Әле беҙ элекке система буйынса эшләй башланыҡ, һәм был мине ҡыуандыра. Тармаҡты үҫтереү, һөнәрҙең абруйын күтәреү өсөн әлеге һымаҡ саралар үткәреү фарыз. Тағы ла мөһимерәге – ауыл халҡына эш кәрәк. Күпселек ир-егет эш хаҡы түбән булғанлыҡтан ситтә, Себерҙә бил бөгөргә мәжбүр.