Бөрйән районының Иҫке Монасип ауылындағы янғын бөтә республиканы шаңҡытты. Һин дә мин йәшәп ятҡанда дүрт ғаиләгә ҡара ҡайғы килгән: ғүмер буйына йыйған донъялары бер нисә сәғәттә көл-күмергә әйләнгән. Ярай әле ҡорбандар юҡ. Ҡан-ҡәрҙәштәребеҙгә ярҙам итеү маҡсатында “Рәсәй – Башҡортостан” телеканалының милли тапшырыуҙар бүлеге мәрхәмәтлек акцияһы ойошторған. Ошо турала бүлек етәксеһе Уйылдан ҒӘЛИН һөйләй.
– Бурҙан ҡала, ә ут-һыуҙан ҡалмай, тиҙәр. Бөрйәндәге афәтте ишетеп, ныҡ тетрәндек. Телеканал директоры Азамат Сәлихов менән кәңәшләш­кәндән һуң, монасиптарға мотлаҡ ярҙам итергә кәрәк тигән аныҡ ҡарарға килдек. Эште ниҙән башларға? Телевидение аша йән өшөткөс яңылыҡты тиҙ арала тотош Башҡортостанға тараттыҡ. Был турала хәбәрселәр Рәлиә Сәхипгәрәева – башҡорт телендә, ә Зилә Афзалова урыҫса текст яҙып, оператор Олег Беляев көслө сюжет әҙерләгәс, “Хәбәрҙәр”ҙә күрһәттек. Уны күҙ йәштәрен тыйып ҡарау мөмкин түгел. Ҡайһылай ҡыҙғаныс: бер ҡат кейем менән генә тороп ҡалған һәр береһе. Бынан тыш, тема “Ауаз” тапшырыуында ла сағылыш тапты.
Эйе, беҙ хәбәр еткереүсе генә түгел, ә булышлыҡ итеүсе бурысын да үтәргә тейеш бит әле. Башта акция хаҡындағы иғланды социаль сел­тәрҙәр аша тараттыҡ. Телеүҙәк фойе­һына махсус ҡумта урынлаш­тырҙыҡ, теләгәндәр унда аҡса һала. Шунда уҡ кейем-һалым, башҡа кәрәк-яраҡ йыйыу өсөн бер бүлмә хәстәрләнек. Халыҡтың эркелеп килеүе, битараф булмауы һөйөндөрҙө. Көн дә ниҙер килтерәләр. Бер апай әйтеүенсә, 70-се йылдарҙа ошондай уҡ ҡайғыны башынан үткәргән, шуға был күренештән бер нисек тә ситтә тороп ҡала алмай. Ә 60-ты ҡыуған ағайҙың һүҙҙәренә ҡарағанда, өйө янып юҡҡа сыҡҡас, бөтөнләй сит кешеләрҙең хәстәрен тойған.
Бәләгә юлыҡҡандарға, оҙайлы ям­ғырҙар һәм һыуыҡтар башланғансы, йорттарын төҙөп бөтөрөргә кәрәк. Бүтәндәр ҙә беҙгә ҡушылһа ине. Белеүебеҙсә, Бөрйән районы хаки­миәте лә көнкүреш кәрәк-ярағы йыйыуҙы ойошторған, банкта махсус иҫәп асҡан.
Август аҙаҡтарында Иҫке Монасип ауылына барып, ярҙам йө­ҙө­нән йыйылған әйберҙәрҙең, аҡса­ның барыһын да янғындан зыян күргәндәрҙең ҡулына тапшырырға уйлайбыҙ.