Әле – ауыл эшсәндәре өсөн иң ҡыҙыу мәл. Беренселәрҙән булып һоло һуғырға төшкән Ленин исемендәге кооператив игенселәре менән яҡындан танышыу маҡсатында Баймаҡ райо­ны хакимиәте башлығының ауыл хужалығы буйынса беренсе урынбаҫары Азат Шәриповтың машинаһында район баҫыуҙарын гиҙәбеҙ. “Толпар” яуаплылығы сикләнгән йәмғиәтенең әкрен генә иҫкән елгә туҡ башаҡтарын елберҙәткән иген баҫыуы аша үтеп, Ҡуянтау баҫыуына юл алдыҡ.
­— Быйыл уңыш яҡшы, тик ваҡытында йыйып өлгөрөргә кәрәк, — тип хафалана Азат Булат улы. — Әле һолоноң иң өлгөргән сағы, бер-ике көнгә һуңлағанда, ул ҡойола башлап, уңыш кәмейәсәк.
Күҙ күреме етмәҫ яланда баҫыу караптары “йөҙә”: кемдәрҙер бой­ҙайҙы яҫма­ларға һала, икенселәре урып һуға, өсөн­сөләр ашлыҡты машинала бураларға ташый. Хужа­лыҡ­тың баш агрономы Урал Әх­мәт­йәнов әйтеүенсә, 200 гектар­ҙағы һоло урып йыйылған. Ул бы­йыл үҙенең төшөмө менән ҡы­уан­дырған – гектарынан 20 центнер биргән. Көндәр аяҙ торғанда, эште тиҙ арала тамамлап, арпа баҫыуына төшөргә йыйыналар.
Әйткәндәй, Ленин исемендәге хужалыҡ игенсе­ләренә быйыл 2 мең 500 гектарҙа иген культураһын йыйып алыу бурысы тора. Бының өсөн бар шарттар булдырылған: техника әҙер, яғыулыҡ етерлек. Хужалыҡта ҡышҡылыҡҡа мал аҙы­ғын туплау ҙа дауам итә, әле 1510 тонна бесән әҙерләнгән, силос һәм сенаж һалына.
Икмәк бешереүсе Зилә Рысмө­хә­мәтова, ашнаҡ­сылар Миңнур Ишали­на, Зәлифә Исхаҡова иген­селәр өсөн тәмле аш-һыу әҙерләй.
Урып һуғыуҙа хужалыҡтың тәж­ри­бәле комбайнсылары Зөфәр Үтә­­баев, Альберт Шаһморатов, аш­лыҡ ташыусы водитель Шәфҡәт Ғай­син юғары һө­ҙөм­тәләргә ирешә.
Йәйҙең бер көнө йылды туйҙыра тигән мәл етте ауыл кешеһенә. Таң һарыһынан алып ҡара кискә тиклем тир түккәндәрҙең өҫтәле мул буласағына шик юҡ.