Санкция иғлан ителгән продукцияны юҡ итеү халыҡтың туҡланыу сифатына йоғонто яһамаясаҡ, тип иҫәпләй Дәүләт Йыйылышы – Ҡоролтай Рәйесе Константин Толкачев.

Ғәмәлдәге санкциялар тейешле норматив документҡа нигеҙләнә, шуға күрә уларҙы тор­мошҡа ашырыу зарур. Етмәһә, төрлө мутлыҡ ҡылыу – сит илдән сифатһыҙ, гендары үҙгәр­телгән аҙыҡ-түлек индереү осраҡтары ла бар. Уларҙың сығышын, хәүефһеҙлеген раҫлаған ветеринария тикшереүе һәм башҡа билдә­ләре лә булмай.
Спикер фекеренсә, күрше төбәктәрҙә бындай тауарҙы “ҡулға алыу” күренештәре Рәсәй баҙарына кешенең ғүмеренә, сәләмәтлегенә янаған аҙыҡ-түлек сығыуын сағылдыра. Белгород өлкәһендә ҡулға төшкән йәшниктәрҙә, мәҫәлән, ысын сыр түгел, ә антибиотиклы сыр продукты табыла.
– Үҙебеҙҙең ауыл хужалығы ярайһы уҡ көслө үҫешкән, ул бер нисә тонна контрабанда тауарын ҡапларлыҡ ҡеүәткә эйә. Ҡабул ителгән саралар сифатһыҙлыҡтан арыныу ғы­на түгел, урындағы етештереүселәргә һө­ҙөм­тәле эшләү мөмкинлеген дә бирәсәк, – тип белдерҙе Константин Толкачев. – Тыйыл­ған тауарҙы юҡ иткәндән хаҡтар күтәрел­мәйәсәк.
Әйткәндәй, Владимир Путиндың “Рәсәй Федерацияһының хәүефһеҙлеген тәьмин итеү маҡсатында айырым махсус иҡтисади алымдар ҡулланыу” тураһындағы Указы үҙ көсөнә инде. Ил Хөкүмәте Федераль таможня хеҙмәтенә, “Россельхознадзор”ға, “Роспот­ребнадзор”ға тыйылған исемлеккә ингән тауарҙы юҡ итергә тигән йөкләмә бирҙе. Рәсәйҙә был эш 6 августа башланды.