Күмертау һайлау округы буйынса Башҡортостан Дәүләт Йыйылышы — Ҡоролтай депутатын өҫтәмә һайлауҙа теркәлгән кандидаттар бушлай эфир ваҡытын бүлеште. Үҙәк һайлау комиссияһы радио, телевидениела кандидаттар өсөн йәрәбә үткәрҙе.

Башҡортостан юлдаш телеканалы, «Юл­даш» радиоһы, «Рәсәй» (Рәсәй-1) телекана­лы һәм «Рәсәй радиоһы»ның төбәк эфи­рында сығыш яһауға йәрәбә һалыуҙа кандидаттар һәм һайлау бе­рек­мәләре вәкилдәре ҡатнашты. Округ буйынса бөтәһе биш кандидат теркәлгән. Улар — ЛДПР-ҙан «Үҫеш» сауҙа-төҙөлөш ком­панияһы» яуаплылығы сикләнгән йәмғиәтенең генераль директоры Артем Дьяченко, «Ғәҙел Рәсәй»ҙән «Стройинвест» яуаплылығы сикләнгән йәмғиәтенең директор урынбаҫары Александр Никитин, «Берҙәм Рәсәй»ҙән «Акрополь» яуаплылығы сикләнгән йәмғиәтенең генераль директоры Хәйҙәр Ғайсин, КПРФ-тан «Урал ресурстары» яуаплылығы сикләнгән йәмғиәтенең арбитраж идара итеүсеһе Николай Гладилов, «Рәсәй патриоттары»нан шәхси эшҡыуар Максим Варламов.
Туймазы округы буйынса депутатлыҡҡа кандидаттар араһында эфир ваҡыты бүлеү буйынса йәрәбә 23 июлдә үтте.
Сентябрҙә ике һайлау округында Дәүләт Йыйылышы — Ҡоролтай депутаттарын өҫтәмә һайлау ойошторола. Үҙәк һайлау комиссияһы Туймазы һәм Күмертау һайлау округтары буйынса өҫтәмә һайлау тәғәйенләне.
Ҡоролтай депутаттары Константин Чистяков менән Андрей Макаровтың вәкәләттәре ваҡытынан алда туҡтатылыуға бәйле ике мандат алмаштырыла.