Беҙҙең фермерҙар ҙа, шәхси ярҙамсыл хужалығын алып барғандар ҙа йәшелсә-емеш үҫтерә белә. Тик йыл һайын бер үк ҡыйынлыҡ — һатыу мәсьәләһе — алдына баҫалар. Хәҙер иһә был йәһәттән талаптар ҙа көсәйә. Сер түгел: һәр кем баҙар кәштәһе янына баҫа алмай, ҡаланыҡыларға туранан-тура барыу ҙа мөмкин түгел. Сауҙа нөктәләре иһә эшкәртелгән, төрөлгән, тауар “йөҙө” индерелгән продукцияға ғына өҫтөнлөк бирә. Кафе-ресторандар тураһында әйтеп тораһы ла юҡ. Һәр хәлдә, проб­лема бар, уны хәл итеү юлын эҙләргә кәрәк.

Ошо йәһәттән Өфөлә республика фер­мер­ҙары өсөн конференция ойошторолдо, унда 150-нән ашыу кеше ҡатнашты. Аграрсыларҙан тыш, сарала эшкәртеүселәр, ресторан селтәрҙәре, төбәк сауҙа вәкилдәре булды.
— Аҙыҡ-түлек етештереүселәрҙең, эш­кәр­теүсе һәм һатыусыларҙың һөйләшеп, бер­ләшеп эшләүе мөһим. Әгәр фермер яҡ­шы ризыҡ үҫтергән икән, ул уны ҡайҙа һаҡ­ларға, эшкәртергә, ҡаптарға һалырға кә­рәк­леген белергә тейеш, — тине сығы­шында Башҡортостан сауҙа ассоциацияһы рәйесе Виталий Черевков.
Рестораттар һәм отельерҙар ассо­циа­ция­һы рәйесе Павел Емельянов иһә фер­мер­ҙарҙың үҙ тауарын ресторандарға тәҡдим итеү буйынса бәйләнешкә инеп бармауын билдәләне. Шуға ла был учреждениелар 80 процент аҙыҡты ситтән ала. “Беҙ диалогка барырға әҙер. Проблеманы хәл итеү юлы — аралашыу”, — тине ассоциация рәйесе.
Республиканың Сауҙа һәм ҡулланыу­сылар хоҡуҡтарын яҡлау буйынса дәүләт комитеты етәксеһе Рөстәм Камалетдинов Башҡортостан сауҙа ассоциацияһының ике яҡтың баҙарын көйләү йәһәтенән бар мөмкинлеккә эйә булыуын белдерҙе.