Бик үк яңы булмаһа ла, яңынан “йән өргәс”, “КамАЗ”ға һоҡланып туймаҫлыҡ. Ана бит, үләнде өйөп тейәгән дә елдерә генә. Ирекһеҙҙән йөк машинаһын ул хеҙмәт иткән хужалыҡ менән сағыштырып ҡуйҙым: «деталдәре» иҫкереп, тарҡалыу ҡурҡынысы янаған ойошма бөгөн йәнә гөрләп эшләй. Ә сере нимәлә һуң?..

«КамАЗ» сенажды бушатыу менән, ҡеүәтле “К-700” тракторы уны тығыҙларға тотондо. Әйткәндәй, мал аҙығы үҙенсәлекле итеп әҙерләнә икән бында: үләнгә арыш та ҡушалар – шулай туҡлыҡлыраҡ була.
— “Күндерәк” ауыл хужалығы предприятиеһы бөлөү алдында ине. Инвесторҙар ярҙамында ул яңы һулыш алды. Мал һаны ишәйә, кешеләргә эш урыны булдырыла, хеҙмәт хаҡын аҡсалата алалар, — ти район хакимиәте баш­лы­ғының иҡтисад һәм агросәнәғәт комплексы буйынса урынбаҫары Фәрит Исмәғилев.
— Мәҫәлән, Стәрлетамаҡ районынан һауын һыйырҙары ҡайтарылды. Былтыр һауым бер баш малдан 13 литр булһа, быйыл 18-гә етте, — тип һүҙгә ҡушыла хужалыҡ етәксеһе Дато Кардаво. — Әммә был сик түгел – киләсәктә ике тапҡырға арттырырға планлаштырабыҙ. Мал һанын да күбәйтергә уйлайбыҙ.
– 4 мең гектар сәсеү майҙаны бар. Унда иген, сөгөлдөр, бесән һәм башҡа төр культура үҫтерәбеҙ. Быуа быуып, балыҡ үр­сетергә ине. Маҡсаттар күп, эшсе ҡулдар ғына етешһен. Уларға бер аҙ ҡытлыҡ булды, ләкин был мәсьәлә лә яйлап хәл ителә: бөгөн хужалыҡта өс ауылдан 100-ҙән ашыу кеше эшләй, күптәр Себерҙән кире ҡайта башланы, — ти хужа, кадрҙар мәсьәләһен дә ҡайғыртып.