Омск ҡалаһындағы казарма емерелеү һөҙөмтәһендә Башҡортостандан биш егет һәләк булыуы тураһында хәбәр иткәйнек инде. Өс егет иһә – Мәскәү ҡалаһындағы дауаханаларҙа. Уларҙың һаулығын әлеге мәлдә табиптар күҙәтә, егеттәр тейешле медицина ярҙамы ала.

Ейәнсура районынан Илнур Ҡыуан­дыҡов һауығыуға бара. Дауахананан һуң ул реабилитация курсы үтәсәк. Илнурға 24 йәш. БДУ-ның тарих факультетын тамамлағандан һуң, хәрби хеҙмәткә китә.
Стәрлетамаҡ егете Владимир Петровтың хәле тотороҡло тип баһалана. Уның эргәһен­дә – ата-әсәһе.
Саҡмағош егете Рөстәм Нәбиевтең иһә хәле әлегә ауыр. Ул аңында булһа ла, оҙайлы дауалау талап ителә. Әсәһе уның янында.
Рәсәйҙең Оборона министр­лы­ғы һалдаттарҙың яҡындарын ҡу­наҡханаға урынлаштырыу, туҡ­ландырыу өсөн сығымдарҙы үҙ өҫтөнә алған. Рәсәй Президенты ҡарамағындағы Башҡортостан Рес­публикаһының Тулы хоҡуҡлы вәкиле тарафынан да һәр яҡлап ярҙам күрһәтелә. “Башҡортостан” гәзите иһә егеттәрҙең тиҙерәк аяҡҡа баҫыуын теләй.
Әйткәндәй, әлеге фажиғә тағы бер башҡорт егетенең ғүмерен өҙ­ҙө: Силәбе өлкәһенең Ар­ғаяш районы халҡы Азат Шәң­гәрәев (һүрәттә) менән бәхилләште. Баш­ҡортос­тандың Силә­бе өлкәһендәге Тулы хо­ҡуҡлы вәкиллегенән хәбәр итеүҙәренсә, Азат билдәле стронгмен Эльбрус Ниғмә­туллинда шөғөлләнгән, уға ҙур өмөт бағлан­ған. Апрель айында ғына 18 йәше тулған.