Мәжлестең йәме – ҡунаҡты асыҡ йөҙ менән ҡаршылауҙа, уға хөрмәт күрһәтеүҙә. Ошо хәҡиҡәткә БРИКС һәм ШОС саммиттарында йәнә бер инандыҡ: сит ил вәкилдәре Башҡортостан халҡының ихласлығына һоҡланып ҡайтты.

Был уңышта ирекмәндәрҙең өлөшө баһалап бөткөһөҙ. Улар ҡунаҡтар менән һәр саҡ бергә булды, ситтән килгәндәр ҡыйынлыҡ тоймаһын өсөн барлыҡ көсөн һалды.
– Саммиттар мәлендә Өфөнөң “визит карточкаһы” кеүек булдығыҙ, – тине республика Башлығы Рөстәм Хәмитов ирекмәндәр өсөн ойошторолған байрам кисәһендә. – Ҡунаҡтар һеҙҙең эштән бик ҡәнәғәт ҡалды. Уларҙан көн дә күпләп телеграмма, рәхмәт белдерелгән хаттар алабыҙ. Был – һеҙҙең дә хеҙмәт емеше.
Рөстәм Зәки улы ирекмәндәргә ҙур рәхмәт әйтеп, уларҙың республика ғына түгел, тотош Рәсәй өсөн файҙалы, юғары әһәмиәткә эйә эш башҡарғанын билдәләне.
– Башҡортостан хәҙер донъя кимәлендә танылды, – тине төбәк Башлығы байрам сығы­шында. – Алда беҙҙе саммиттарҙа ҡатнашҡан илдәр менән иҡтисади бәйләнеш булдырыу, республикаға инвесторҙар, туристар йәлеп итеү һәм башҡа мөһим эштәр көтә. Ошо бурыстарҙы тормошҡа ашырыуҙа һеҙгә – төрлө телдәрҙе белгән, йәш, матур, тәүәккәл кешеләргә – ҙур ышаныс бағлайбыҙ.
Артабан Рөстәм Хәмитов айырыуса яҡшы эш һөҙөмтәһе күрһәткән биш ирекмәнгә рәхмәт хаты тапшырҙы. Тәбрикләнгәндәр араһында иң өлкәне – 61 йәшлек Венера Попкова һәм иң йәше – быйыл XI класты тамамлаған Тимур Мөлөков. Дөйөм алғанда, өс көнлөк йыйында 640-тан ашыу ирекмән ҡатнашҡан. Әлеге байрамда яңғыраған “Өфөгә хәҙер нимә етмәй?” тигән һорауға улар: “Метро, ирекмәндәр өсөн мәҙәниәт һарайы, турис­тар кәрәк”, – тип яуапланы.