“Трикотаж” йәмғиәте 55 йыл элек халыҡҡа көнкүреш хеҙмәттәре күрһәтеү комбинатының цехы булараҡ ойошторолған, 1970 йылда трикотаж әйберҙәр бәйләү һәм ремонтлау йүнәлешендәге айырым фабрикаға әүерелгән.

Предприятиеға тәүҙә үҙ эшенең ысын оҫтаһы булып танылған Бибикамал Ғи­лемханова етәкселек итә. 1983 йылда иһә уға алмашҡа фабриканың баш хи­сап­сыһы Галина Сотникова килә. Һәр етәксе предприятиены үҫтереүгә, эшмәкәрлеккә заманса төҫ биреүгә күп көс һала. Әйткәндәй, Галина Викторовна өс тиҫтә йылдан ашыу предприятиеның ал­маш­тырғыһыҙ етәксеһе була, намыҫлылығы, уңғанлығы менән ҙур абруй яулай. Ул саҡта фабриканың Яңауыл һәм Тәтешле райондарындағы цехтары уңышлы эш­ләй, 230 самаһы кешегә хеҙмәт урыны бул­дырыла. Ай һайын тиерлек унға яҡын яңы модель етештерелә. Фабрика шәхси продукцияһы менән республиканың төнь­яҡ-көнбайыш төбәге халҡын тәьмин итә.
Ҡыҙғанысҡа ҡаршы, уҙған быуат аҙағындағы үҙгәртеп ҡороуҙың ҡырыҫ елдәре еңел сәнәғәт тармағын ныҡ ҡаҡшата. Һөҙөмтәлә әлеге фабрика ла төрлө үҙгәреш кисерә, әммә электән килгән йолаларына, асылына тоғро ҡала. Директор Галина Сотникованың ойоштороу һәләте, идара итеү оҫталығы, киләсәкте алдан күрә белеүе коллективҡа һынау осорон лайыҡлы үтергә ярҙам итә. 1995 йылда, Рәсәйҙә мәктәп формаһы буйынса бәхәстәр барғанда, Нефтекама трикотажсылары үҙҙәренең кейем мо­дел­дәрен етештерә. Зәңгәр плиссе итәк, шул уҡ төҫтәге жилет һәм жакеттар матур, уңайлы булыуы менән уҡыу­сыларға ла, ата-әсәгә лә оҡшай. Тәүге өлгөләрҙе Неф­текамалағы 3-сө мәктәпкә тәҡдим итәләр. Һөҙөмтәлә уҡыу йортоноң ул саҡ­тағы етәкселәре яңы мәктәп фор­маһына беренселәрҙән булып фатиха бирә. Артабан башланғыс ҡалала, шулай уҡ рес­публиканың байтаҡ мәғариф уч­реж­дениеһында яҡлау таба, һәм фаб­риканың моделдәре берҙәм мәктәп формаһына әүерелә.
Әле иһә ҡаланың Социалистик урамындағы 34-се йортта урынлашҡан “Трикотаж” йәмғиәтендә уҡыусылар өсөн 30-ға яҡын кейем төрө етештерелә. Әйт­кәндәй, бында өлкәндәр ҙә хеҙмәт­ләндерелә, улар хатта заманса кейемгә заказ бирә ала. Мөрәжәғәт итеүселәр ифрат күп, ти хеҙмәткәрҙәр.
Һәр заказды барлыҡ оҫталығын, күңел йылыһын һалып үтәй улар. Алтын ҡуллы оҫталар Гөлзимә Хисмәтуллина, Елена Семанина, Вәзирә Хлебникова, Зәһинә Камилйәнова, Светлана Мельникова, Венера Иванова, Финисә Хәмәҙиева, Ольга Семенова, Ирина Зыянгирова, Валентина Шмонова һәм Ольга Ғирфанова айырым маҡтауға лайыҡ. Берҙәм коллектив про­дукцияның сифатын яҡшыртыу маҡ­сатында тырышып хеҙмәт итә.