Күл эргәһенән ер алып буламы?

Балыҡ тоторға яратам. Был — минең бала саҡтан яратҡан шөғөлөм. Шуға берәй күл йә йылға эргәһендәге ерҙе һатып алып, йорт төҙөргә ине. Ләкин ҡоролмаларҙы һыу ятҡылыҡтарына яҡын һалырға ярамай, тип ишеткәйнем. Был дөрөҫмө?
Раил.
Өфө районы.

Һыу ятҡылыҡтары эргә­һендәге биләмәләрҙе фай­ҙаланыу тураһында Рә­сәй­ҙең Һыу кодексында яҙылған. 65-се статьяла билдәләнеүенсә, диңгеҙ, йыл­ға, күл һәм һыу һаҡ­лағыстар ярҙары эргә­һен­дәге биләмәләр һаҡлана һәм хужалыҡ эшмәкәрлеге алып барыуҙа айырым сикләүҙәр ҡуйыла. Был зонаның киңлеге йылға йәки күлдең оҙонлоғона бәйле. Мәҫәлән, ун ки­лометрҙан кәм йылғаның һаҡланған биләмәһе 50 метр булһа, 50 километр оҙонлоғондағыһыныҡы — 200 метр. Күл йәки һыу һаҡлағыс өсөн был киңлек — 50 метр. Йылға йәки күл сиктәрендә һыуҙы бысра­ныуҙан һаҡлаған ҡорол­малар булған осраҡта ғына хужалыҡ тәғәйен­ләне­шендәге йәки башҡа объекттарҙы төҙөү һәм файҙаланыу рөхсәт ителә. Һыуҙан 20 метр арауыҡ­тағы урын — дөйөм фай­ҙаланыу өсөн, шуға бер кемде лә был биләмәгә барыуҙан тыйып булмай. Ә арғыраҡ ерҙәрҙе ҡуртымға йәки һатып алырға мөмкин (Рәсәй Һыу кодексының 30-32-се, 34-се статьялары).
Иҫкәрмә. Һаҡланған биләмәләрҙә ағын һыуҙы ерҙе һуғарыу өсөн фай­ҙаланыу, янында зыярат булдырыу, радиоактив, химик, шартлаусы, ағыу­лы, зыянлы матдәләрҙе ташлау, махсус булғанда­рынан тыш, транспорт туҡталҡаһы итеү тыйыла.

Барыһы ла дәғүә итә алмай

1981 йылда мине әсә­лек хоҡуғынан мәхрүм иткәйнеләр. Хәҙер, улым үлгәс, бар мөлкәте ҡатынына ҡалды. Миңә лә өлөш сығырға тейеш түгелме ни?

Зәйтүнә.

Миәкә районы.

Ҡасандыр әсәлек хоҡу­ғынан мәхрүм ителгән бул­һағыҙ, ҡыҙғанысҡа ҡаршы, яҡты донъя менән хуш­лашҡан балағыҙҙың мөл­кәтенә хоҡуғығыҙ юҡ. Васыятнамә булған осраҡ­та ғына уға дәғүә итә алыр инегеҙ. (Рәсәй Гражда­н­лыҡ кодексының 1117-се статьяһы).