Заманса шарттарҙа экстремизм менән террорсылыҡҡа ҡаршы нисек көрәшергә? Илдең милли именлеген тәьмин итеү йәһәтенән ниндәй саралар күрергә? Был аҙнала Һамар ҡалаһында үткән Рәсәй Федерацияһы Президентының Волга буйы федераль округындағы Тулы хоҡуҡлы вәкиле ҡарамағындағы Советтың сираттағы ултырышында төбәк етәкселәре, Дәүләт Думаһы депутаттары, Рәсәйҙең Федерация Советы ағзалары, хоҡуҡ һаҡлау органдары вәкилдәре ошо һәм башҡа һорауҙарға яуап эҙләне. Осрашыуҙа Башҡортостан Башлығы Рөстәм Хәмитов та ҡатнашты.
Рәсәй Президентының Волга буйы федераль округындағы Тулы хоҡуҡлы вәкиле Михаил Бабич билдәләүенсә, тема бик мөһим. Был осраҡта хатта донъя дәүләттәренең ошо бәлә менән оҙаҡ һәм ҡайһы ваҡытта уңыш­һыҙ көрәш алып барыуын да билдәләмәй булмай.
— Террорсылыҡтың төп маҡсаты — халыҡты ҡурҡытыу. Шуға ла ҡәһәрле акциялар ойоштороусылар мөмкин тиклем күберәк кешене ҡырыу ниәте менән яна. Кешелекте юҡҡа сығарыуға ҡоролған технологияларҙың һәм алымдарҙың камиллаша барыуы, киң мәғлүмәт сараларының һәм Интернеттың йәмғиәттең аңына йылдам тәьҫир итеүе арҡа­һында бөгөн террорсылыҡ, ҡыҙғанысҡа ҡар­шы, осраҡлы күренеш түгел. Уның “ҡап­ҡан”ына теләһә кем эләгә ала, — тине Михаил Викторович.
Михаил Бабич билдәләүенсә, террор­сы­лыҡҡа ҡаршы тороуҙа айырыуса төрлө ки­мәлдәге власть органдарының һәм йәм­ғиәт­тең берҙәм эш итеүен көсәйтеү мө­һим. Был йәһәттән Рәсәй Президенты тарафынан раҫланған “2013 — 2018 йылдарға Рә­сәйҙә террорсылыҡ идеологияһына ҡар­шылыҡ күрһәтеү комплекслы планы” айырым урын алып тора. Совет ултырышында шулай уҡ экстремизмға ҡаршы көрәш мәсьәләләре лә тикшерелде. Белгестәр билдәләүенсә, сепаратизмды иҫкәртеү, милләт-ара хаслыҡҡа юл ҡуймау — милли хәүефһеҙлекте тәьмин итеүҙә төп бурыс.