Таҙтүбә ауылында наркомандарҙы дауалау үҙәге эшләй. Бында сирлеләр һәммәһе лә үҙ теләге менән дауалана, дөрөҫ юлға баҫыуҙы маҡсат иткән.
Картья йылғаһы буйында урынлашҡан үҙәккә барыһы ла ҙур өмөт бағлап килгән. Ир-ат һәм ҡатын-ҡыҙ дауаланған йорттар араһындағы сиркәү тирә-йүнгә илаһилыҡ өҫтәй. Роман атаның һүҙҙәренә ҡарағанда, наркотикка бәйлелектән арынырға мөмкин — теләк кенә булһын. Уға тотош Рәсәйҙән мөрәжәғәт итәләр, һәр ҡайһыһына ярҙам итергә тырыша. Мәҫәлән, тал сыбығылай нескә, төҫкә-башҡа сибәр Марина Томск ҡалаһынан килгән.
– Һөйөү утында яндым, ғазап сиктем, егетемде юғалтыуҙан ҡурҡып, төндәр буйы илай торғайным, – ти 20 йәшлек һылыуҡай. – Тәүҙә мөхәббәтем үҙен шул тиклем итәғәтле тотто, осрашҡан һайын сәскә биреп ҡыуан­дырҙы. Мин дә ашҡынып торҙом уны күрергә. Бер көн эңер төшөр алдынан егетем, яр буйына саҡырып, нимәлер тәмләтте. Наркотикка бәй­лелек шунан башланды ла инде...
Танышыбыҙ Баш­ҡортостандағы дауалау үҙәге ту­раһында Интернеттан белеп шыл­ты- ратҡан. Марина ту­ғыҙ ай дауалана, моғайын, тулыһын­са таҙарыныуға бер йыл етер. Шулай уйлай Роман Тарасов.
Ә бына Ни­ко­лайҙың “стажы” — 14 йыл. Йәш саҡ – дыуамал саҡ, ти­гән­­дәй, Тольятти ма­лайы IХ класта уҡы­ғанда уҡ ҡыҙыҡ күреп наркотик ме­нән “танышҡан”. Аҙаҡ терһәген теш­ләрҙәй булған да бит... Етмәһә, хәҙер ғаиләле. Ирҙең һүҙҙәренә ҡарағанда, кәләше көтөргә вәғәҙә биргән, һауығыу менән тормошон өр-яңынан башларға теләй.
Үкенескә ҡаршы, бында Башҡор­тостандыҡылар ҙа юҡ түгел. Күбеһе — тимер юл станцияһы урынлашҡан район-ҡалаларҙан.
Пациенттар буш ваҡытын нисек уҙғара? Уларға Роман ата менән мәхәллә кешеһе яҡшылыҡҡа һәм изгелеккә өндәгән лекциялар уҡый, “Аллаһ законы” тигән китапты өйрәтә. Бынан тыш, психологтар, педагогтар һәр сирле менән айырым һөйләшә. Йәшәгән йорттарын йыйыштырыу, ихатаны тәртипкә тотоу – пациенттарҙың бурысы. Бынан тыш, баҡса үҫтерәләр, теплицаны тәр­биәләп тоталар. Әйтеү­ҙәрен­сә, бында ҡа­сан­дыр мал-тыуар ҙа бул­ған. Уны таҙ­тү­бә­ләргә таратып бир­гәндәр, әле ҡош-ҡорт ҡына аҫ­­райҙар. Аҙнаһына бер тапҡыр мунса инеү ойошторола. Роман Сергеевич билдәләүенсә, пациенттарға Ин­тер­нетҡа инеү ты­йылған, әммә бик кәрәк саҡта телефондан һөйлә­шер­­гә рөхсәт ителә.
– Гашишты ауыҙ итһәң, ожмахта йөҙәсәкһең, тигәндәренә ышан­ғайным, ә ысын рәхәтлек бында икән, – тип ҡыуана бер үҫ­мер.
Үҙәктә кем генә юҡ! Бер нисә юға­ры белеме бул­ған­дар ҙа, ябай эш­селәр ҙә, яңғыҙаҡтар ҙа, ғаиләлеләр ҙә...
Донъя бик ҡыҙыҡ ҡоролған. Йәшә­йештең көрәш икәнлегенә ваҡыт үткән һайын тәрәнерәк төшөнә бараһың. Һәр кем тормошон үҙенсә төҙөй. Бына ошо юлда аҙашмау кешенең ихтыяр көсөнә бәйле.