Йәмле Ҡыҙыл буйында урынлашҡан “Ирәндек” балалар ял һәм һауыҡтырыу лагеры районда ғына түгел, Башҡортостанда ла иң яҡшылар рәтендә. Быны уның былтыр “Иң яҡшы лагерь” республика конкурсында гран-при яулауы дәлилләй.

Әбйәлил районы хаки­миәтенең мәғариф бүлеге начальнигы Вәлит Зәй­нуллин әйтеүенсә, быйыл ла­гер­ға дүрт ағымда меңгә яҡын бала ҡабул ителәсәк. Әле беренсе сменаға 250 малай һәм ҡыҙ килгән, уларҙың 108-е – төрлө ра­йон һәм ҡала уҡыусылары.
– “Ирәндек”тә республи­ка­ның һә­­ләтле балалары өсөн асылған “Йәйләү” ял үҙәгенең эш башлауы ҡы­уа­ныслы. Башҡортос­тан­дың 15 ра­йонынан, ике ҡа­ла­һы­нан тыш, Мәс­кәү­ҙән килгән мил­ләттәштәребеҙ ҙә ял итә бында. Кескәйҙәр өсөн уңай­лы шарттар тыуҙы­рыл­ған. Район етәкселеге ла­герға ярҙам итергә һәр саҡ әҙер, – ти Вәлит Әхмәт улы.
Балаларҙың ижади һә­ләт­тәрен үҫтереү, уларҙа милли рух, илһө­йәр­лек тәр­биәләү маҡсатында “Йәй­ләү”ҙе ойоштороусылар хал­ҡы­быҙҙың йолаларына, ауыҙ-тел ижадына, тарихына, мәҙә­ниә­тенә таяна, ял итеүселәрҙе ырыу­ҙарға бүлеп, сағыу, бай йөкмәткеле саралар үткәрә. Был үҙәк програм­ма­һының авторы Мәрйәм Бураҡаева балаларҙы онотмай, ла­гер­ҙа һәр саҡ көтөп алынған оло ҡунаҡ ул.
Лагерь начальнигы Ай­гөл Бәшә­рова әйтеүенсә, ял итеүселәрҙең барыһы ла бик ҡәнәғәт, йыл да килергә атлығып торғандар ҙа байтаҡ.
– Тәрбиәселәр конкурс ниге­ҙен­дә һайлап алынды, сөнки улар һәр бала өсөн яуаплылыҡ тойорға, бәлә­кәстәр менән уртаҡ тел таба белергә тейеш. Вожатыйҙар ара­һында күпселек – Сибай, Өфө, Стәрлетамаҡ ҡала­ларында уҡыған студенттар.
Бер нисә йыл рәттән эшләгән тәжрибәле тәрбиә­селәрҙән Нәркәс Хөснөт­ди­нованы, Азат Мор­та­зин­ды, Айгөл Байғалинаны, Рәйлә Соб­ханғолованы билдә­ләр­гә кәрәк. Йәштәр бала­лар­ҙың ялын күңелле һәм мауыҡтырғыс итеп үткәреү ниәтендә бик ныҡ тырыша, төрлө экскурсиялар ойоштора. Динопарк­ка бар­һындармы, аквапаркта бул­һындармы – һәр сәйәхәт оно­тол­маҫлыҡ хәтирәгә әйләнә. Әйткәндәй, бының өсөн лагерҙың ике автобусы бар.
Туҡланыу мәсьәләһенә айырыу­са етди иғтибар бүленә. Өҫтәлдән еләк-емеш, йәшелсә, итле аш өҙөл­мәй. Көнөнә биш тап­ҡыр тәмле ризыҡтары ме­нән һыйлаған ашнаҡ­сылар Гөлнара Ниязғолова менән Светлана Шакирйәнова апайҙарын балалар яҡын дуҫтарылай күрә.
Ял итеүселәр Ҡыҙыл йылға­һын­да һыу инә, ҡомда ҡыҙына, телә­гәндәр Асҡар­ҙағы “Юрға” ат спорты клу­бының арғымаҡтарында һыбай йөрөй. Әбйәлилдең бер биҙәгенә әүерелгән “Ирәндек”кә килгәндәр сә­лә­мәтлек, көс туплап ҡына ҡайтмай, үҙҙәренә яңы дуҫтар таба, йәйге ялын сағыу үткәрә.