Ғафури районынан яҙылған борсоулы хаттың авторҙары ике ветеран һәм ҡултамғаларын ҡуйған ике тиҫтәнән ашыу кеше ине.

Улар Еҙем-Ҡаран ауылындағы дауа­ха­наның киләсәге нисек булыр, кешеләр сәләмәтлегенә ҡурҡыныс янамаймы тип мәсьәлә күтәрҙе. Күптән түгел яңыр­тыл­ған, бынамын итеп эшләп торған дауа­хананың көтөлмәгән үҙгәрештәр кисереүе хәүеф тыуҙыра икән. Редакция алда аталған хәл буйынса республиканың Һаулыҡ һаҡлау министрлығына мөрәжәғәт итте һәм түбәндәге яуапты алды:
“Красноусол үҙәк район дауаха­на­һы­ның структур бүлексәһе булған Еҙем-Ҡаран ауыл табип амбулаторияһы бер сменала 40 кешене ҡабул итеү, тиҙ ярҙам күрһәтеү мөмкинлегенә эйә. Яҡын-тирәләге биләмәләрҙә 14 фельдшер-акушерлыҡ пункты эшләй. Еҙем-Ҡаран амбулаторияһына 5699 кеше беркетел­гән, шуларҙың 996-һы – балалар. Хеҙ­мәтләндереү радиусы – 15, Красноусол үҙәк район дауаханаһына тиклемге ара – 45 саҡрым. 2015 йылдың 1 ғинуарынан көндөҙгө стационар 10 урынлыҡ ител­гән, койкалар һанын ҡыҫҡартыу күҙал­лан­май. Беркетелгән биләмәне хеҙ­мәт­ләндереү тулы күләмдә һәм сифатлы башҡарыла. Район үҙәк дауа­хана­һының етәкселеге халыҡтың хоҡуғын, законлы мәнфәғәттәрен боҙоуға юл ҡуймаясаҡ”. Тимәк, Еҙем-Ҡаран ауыл табип амбулаторияһының, ундағы итәғәт­ле, иғ­ти­барлы коллективтың халыҡты хеҙмәт­лән­дереүҙе тотороҡло дауам итеренә шикләнеү урынһыҙ.