Учалы районында ижадсыларҙың матур йолаға әүерелгән IХ төбәк-ара семинары булды. Унда Башҡортостан Яҙыусылар союзы ағзалары, интеллигенция вәкилдәре, башҡорт теле һәм әҙәбиәте уҡытыусылары ҡатнашты.

Силәбе өлкәһенең Аҡмулла исе­мендәге әҙәби берекмәһе Учалы районы хакимиәтенең мәғариф ида­­ра­лығы менән тиҫтә йылға яҡын инде ижади бәйләнештә йәшәй. Уның эшенең бер йүнәлеше – төбәктәге яҙыусылар һәм уҡытыусылар ара­һын­дағы ижади хеҙмәттәшлекте ны­ғытыу һәм үҫтереү. Ошондай матур йоланы һаҡлап, Учалы уҡытыу­сыла­ры Силәбе өлкәһенең Арғаяш, Ҡон­шаҡ һәм Сосновка район мәк­тәп­- тәрендә тәжрибә уртаҡлаша, ә силә­беләр тәбиғәт уянған мәлдә Учалы районының Иҫке Байрамғол ауылы янындағы шишмәгә сәйәхәткә юлланып, унда изге Рамаҙан Әүлиәгә зыярат ҡыла.
Ижади осрашыу Бөйөк Еңеүҙең 70 йыллығына һәм Рәсәйҙә Әҙәбиәт йылына арналғанға күрә йөкмәткеле лә, тулҡынландырғыс та булды. Силәбеләрҙе хөрмәтләп, халыҡ йолаһы буйынса татлы ризыҡтар һәм йыр-бейеү менән тәбрикләп, Комсомол урта мәктәбе алдында ҡаршы алдылар.
Комсомол урта мәктәбе директоры урынбаҫары Дилара Саҙретдинова ҡунаҡтарҙы мәктәп менән таныш­тырҙы. Район хакимиәтенең мәғариф бүлеге методисы Зилә Шәрәфет­динова ижади семинарҙың ике төбәк араһындағы хеҙмәттәшлек тураһын­дағы килешеүгә таяныуын билдә­ләне. Башҡортостан Яҙыусылар союзы рәйес урынбаҫары Спартак Ильясов үҙенең сығышында яҙыусы статусы, милли баҫмалар, тәрбиә мәсьәләләре хаҡында ентекләп һөйләне. Сараны Комсомол урта мәктәбе уҡытыусыһы Зөлфиә Фазылова юғары кимәлдә алып барҙы.
Аҡмулла исемендәге әҙәби берекмә етәксеһе Ҡамса Мортазин Силәбе башҡорттары исеменән сә­ләм тапшырып, үҙҙәренең эш тәжри­бәһе менән уртаҡлашты. Арғаяш, Ҡоншаҡ, Сосновка райондары һәм Магнитогорск ҡалаһынан барған яҙыусылар, уҡытыусылар сығыш яһаны. Силәбеләр бер тауыштан “Берҙәмлектә – бәрәкәт” тигән халыҡ әйтемен раҫлап, ут күрше булып йәшәгән милләттәштәренә йөрәк һүҙҙәрен еткерҙе. Ҡамса Мортазин ихлас күңелдән бер төркөм дуҫ­та­рына Башҡортостан Республи­каһы­ның Силәбе өлкәһендәге вәкиллеге исеменән Рәхмәт хаттары тапшырҙы.
Семинарҙың икенсе өлөшө тә­биғәт ҡосағында дауам итте. Ҡунаҡ­тарҙы был юлы изге Әүеш тауына сәйәхәткә Комсомол урта мәктәбе уҡытыусыһы Гөлшат Шаһи­ева алып килде. Ул, Әүеш йәшмәһе, Әүлиә шиш­мәһе хаҡында, Рамаҙан әүлиә легендаһын мауыҡтырғыс итеп һөй­ләп, ҡунаҡтарҙың күңеленә һеңдер­ҙе.
Силәбеләр учалыларҙан бына шундай йәнле тормош һабаҡтары, рух ныҡлығы һәм ғүмерлек тәьҫораттар алып ҡайтты.