Бәхетленең байрамы ла, ҡунағы ла бергә тигәндәй, Рәсәй көнө алдынан республика Башлығы Рөстәм Хәмитов хеҙмәт алдынғыларының бер төркөмөнә дәүләт наградалары тапшырҙы. Бүләкләнеүсе төрлө һөнәр эйәләре, төрлө тармаҡ белгестәре өсөн уртаҡ сифат – хеҙмәткә һөйөү, яуаплылыҡ, оҫталыҡ.
Уларҙың һөнәри кимәлен Башҡортостан етәксеһе юғары баһаланы.
– Йәш быуынға өлгөһөгөҙ. Бөгөн респуб­лика­быҙ­ҙың бик күп тармаҡ буйынса алдын­ғылар рәтендә ки­ле­үен­дә һеҙҙең кеүек эшһөйәрҙәрҙең өлөшө ҙур, – тине ул.
“Башинформсвязь” компанияһының Сибай фи­лиа­лы инженеры Гөлнур Сәфәрғәлина, мәҫәлән, элемтә өлкәһендә утыҙ йылға яҡын эшләй. Телефон, интернет, телевидениеһыҙ бөгөнгө тормошобоҙҙо күҙ алдына ла килтерә алмағас, был һөнәрҙең мө­һим­леге, кәрәклеге хаҡында һүҙ сурытып тороу урын­һыҙ. Иң мөһиме – йәмғиәт Гөлнур Азамат ҡыҙы ише профессиональ кадрҙарына таяна. Бөгөн иһә Гөлнур Сәфәрғәлина “Башҡортостандың атҡаҙанған элемтәсеһе” тигән маҡтаулы исем алып һөйөндө.
– Яратҡан эштең ауыры, ҡыйыны булмай. Кешене сабырлыҡ һәм хеҙмәт тәрбиәләй, тигәйне бер остазым. Ғүмерем буйы ошо фатихаға тоғро ҡалырға тырыштым. Форсаттан файҙаланып, ил, республика етәк­селегенә һәм, әлбиттә, туған коллективыма рәх­мәтемде еткерәм, – тине Гөлнур Азамат ҡыҙы.
“Башҡортостандың атҡаҙанған мәғариф хеҙмәткә­ре” тигән исем алып ҡыуанған Альберт Асатрян ха­ҡын­да ла һүҙ әйтмәү мөмкин түгел. Әрмән йәкшәмбе мәк­тәбенең директоры ул. Ғүмер буйы Башҡортос­танда йәшәгән.
– Ошо изге ерҙә төпләнеүем менән мең тапҡыр бәхетлемен. Республикала һәр милләт вәкиле үҙ телен, тарихын, мәҙәниәтен, ғөрөф-ғәҙәттәрен өйрә­нә алһын өсөн киң шарттар тыуҙырылған. Ҙур рәхмәт! — тине Альберт Аршутович.
Дәүләт наградаларын тапшырыу тантанаһына са­ҡырылғандарҙың һәр ҡайһыһы, уларҙың ҡаҙаныш­та­ры, шәхси сифаттары тураһында әллә күпме һөй­ләрлек, әлбиттә. Ҡайҙа, ниндәй тармаҡта мәшғүл булһаң да, һайлаған һөнәреңә тоғролоҡ, халыҡ мәнфәғәтен ҡайғыртыу аша ғына ошондай бейеклектәргә өлгәшергә мөмкиндер.