Изге маҡсат ҡорға йыйҙы

Башҡортостан гәзите » Йәмғиәт » Изге маҡсат ҡорға йыйҙы

Изге маҡсат ҡорға йыйҙы 05.06.2015 // Йәмғиәт

«Берҙәмлек» халыҡ-ара фестивале Башҡортостанда ғына түгел, тотош Рәсәйҙә мөһим саралар иҫәбендә. Мәҙәни байрам халыҡ ижадын, милли кәсептәрҙе, сәнғәтте киң танытыу, ижади коллективтар менән ныҡлы бәйләнештәр булдырыу, төрлө мәҙәниәттәр һәм рухиәт яңылыҡтары менән уртаҡлашыу кеүек изге маҡсаттар ҡуя.
Быйылғы Халыҡ-ара берҙәмлек байрамын Рәсәйҙең, Башҡортостандың мәҙәниәт министрлыҡтары, Рәсәй Дәүләт халыҡтар дуҫлығы йорто, Республика халыҡ ижады үҙәге, Өфө, Октябрьский ҡалаларының, Дәүләкән, Бәләбәй, Туймазы райондарының хакимиәттәре ойошторҙо.

Фестивалдә ШОС һәм БРИКС илдәренән ижади коллективтар ҡатнаша. 4 июндә ҡунаҡтарҙы ҡабул иткән Октябрьский ҡалаһы ысын мәғәнәһендә милли мәҙәниәттәр майҙанына әүерелде. Бында республикабыҙҙың төрлө төбәктәренән, Мәскәү һәм Силәбе ҡалаларынан килгән ҡурайсылар бәйгеһе башланды. Бөгөн, бәйгелә еңеүселәрҙе бүләкләр алдынан, фестивалдә ҡатнашыусылар ҡала урамынан үтәсәк. Бынан һуң халыҡ Иран, Һиндостан, Төркиә, Ҡытай, Тажикстан, Ҡаҙағстан, Ҡырғыҙстан илдәренән һәм Рәсәй төбәктәренән килгән үҙешмәкәр ижади коллективтарҙың сығышын ҡарап кинәнәсәк. Шулай уҡ илебеҙҙең яңы төбәге – Ҡырым Республикаһы – тамашасыларҙы күстәнәстәре менән һөйөндөрәсәк.
Фестивалдә Рәсәйҙең, ШОС һәм БРИКС илдәренең фоторәссамдары ҡатнаша. Улар Башҡортостандың район-ҡалаларында гүзәл тәбиғәтте, иҫтәлекле урындарҙы, кешеләрҙе, хужалыҡ ҡаҙаныштарын фотоға төшөрөп, донъяға таратасаҡ, ә һуңынан уларҙы фотоальбом итеп нәшерләү күҙ уңында тотола.

Автор: С. НӘЗИРОВ.

Баҫып сығарырға