Һуңғы йылдарҙа Сибай элеваторының эше һүлпәнәйгәйне. Йыл һайын ҡабатланған ҡоролоҡ та йоғонто яһамай ҡалмағандыр, шулай уҡ башҡа сәбәптәр арҡаһында ла предприятие көрсөккә терәлде. 2012 йылда ҡалала үткән “Урал аръяғы” Дөйөм Рәсәй инвестиция форумында ҡул ҡуйылған килешеүгә ярашлы, “боҙ” урынынан ҡуҙғалды. Элеватор бөгөн “СИТНО” агрохолдингы ҡанаты аҫтына алынған.


Күптән түгел яңы тирмән сафҡа инде. Ярты миллиард һум инвестиция йәлеп ителгән ҡоролма тулыһынса заманса техника менән йыһазландырылған. “МИЛЛ СЕРВИС” итальян фирмаһында етеште­релгән ҡеүәтле ҡорамал тәүле­генә 300 тонна иген эшкәртә ала. Бында тар­тыл­ған юғары һәм беренсе сортлы он Рә­сәйҙең 32 төбәгенә һатыуға оҙаты­ласаҡ. Элек һигеҙ кеше эшләгән сменала әле ике хеҙмәткәр барыһына ла өлгөрә. Яңы тирмән пульт аша идара ителеүсе техника менән йыһазландырылған. Тар­тыуға әҙерләнгән бойҙай ете кимәлдә таҙартыу үтә.
Әлбиттә, республикала иң ҡеүәтле тирмәндең бар көсөнә эшләүе өсөн көньяҡ-көнсығыш райондарҙан ғына килтерелгән игендең етмәүе билдәле, шуға күрә Ҡаҙағстан, Алтай крайынан, Ырымбур өлкәһенән дә бойҙай һатып алынасаҡ. Предприятие етәкселеге әйте­үенсә, игендең төрлө төбәктән кил­те­релеүенән ҡурҡырға ярамай, сөнки яҡшы он ете төр бойҙайҙы тарттырғандан һуң ғына барлыҡҡа килә. Сибайҙа етеште­релгән тауарҙың килә­сәктә яҡшы сифатлы булырына шик юҡ. Шулай уҡ он тарттырғандан һуң ҡалған көрпә, кәбәк тә һатыуға ҡуйыласаҡ. “СИТНО” яуаплы­лығы сикләнгән йәмғиә­те етәкселеге әйтеүенсә, эшселәр өсөн бар шарттар булдырылған: ял, душ һәм кейенеү бүлмәләре, түшәм, иҙән, стеналарҙа күҙҙең яуын алырлыҡ яңы кафель.