Бөйөк Еңеүҙең 70 йыллығы уңайынан амнистия иғлан ителде тигән хәбәр ишеттем. Улым, уғрылыҡта ғәйепләнеп, былтыр өс йылға иркенән мәхрүм ителде. Ул заманында Чечен һуғышында ҡатнашҡайны. Ил алдындағы хеҙмәттәрен иҫәпкә алып, ваҡытынан алда иреккә сығармаҫтармы икән?
Ғәлимә Ш.
Туймазы ҡалаһы.

Һеҙҙең һорауығыҙға Өфө ҡалаһы Калинин районының прокурор ярҙамсыһы Индира ЙӘҒӘФӘРОВА яуап бирә:

– Быйыл 24 апрелдән Рәсәй Дәүләт Ду­ма­һының “1941 – 1945 йылдарҙағы Бөйөк Ватан һуғышында Еңеүҙең 70 йыллығы ай­ҡан­лы амнистия иғлан итеү тураһын­да”ғы ҡарары законлы көсөнә инде.
Амнистия – дәүләт власы ҡарарына яраш­лы, ғәмәлдәрендә енәйәт һыҙаттары иҫбат­ланған йәки енәйәт ҡылған тип эҙәр­лекләнгән кешеләргә ҡарата күрелгән ярлы­ҡау сараһы. Уның асылы яза сараһы­нан тулыһынса йәки өлөшләтә азат итеүгә йә иһә уны йомшар­тыуға ҡорола. Башҡа федераль закондарҙан айырмалы, амнистия ул ғәмәлгә ингәнгә ҡәҙәр ҡылынған енәйәт­тәргә генә (әлеге осраҡта 2015 йыл­дың 24 апреленә тиклемгеләргә) ҡағыла. Ҡарар алты ай, йәғни 24 октябргә тиклем, ғәмәлдә ҡала.
Документҡа ярашлы, яза сараһы шартлы рәүештә билдәләнгән һәм енәйәт ҡылып та ирек­тән мәхрүм ителмәгән кешеләр амнис­тия­ға эләгә. Бынан тыш, һаҡһыҙлыҡ арҡа­һын­да ҡылынған енәйәт өсөн ҡулға алын­ғандар һәм аңлы рәүештә ҡылынған енәйәт өсөн биш йылға хөкөм ителгән бәлиғ булмағандар иреккә сығарыла. Ҡарарҙа билдәләнеүенсә, тәүтикшереү органдары һәм судтар ошондай кешеләргә ҡарата асҡан енәйәт эштәрен дә туҡтатырға тейеш.
Әлеге амнистияның үҙенсәлеге: ул хәрби хеҙмәткәрҙәргә, Рәсәй Ҡораллы Көстәренең граждандар персоналына, эске эштәр органдары хеҙмәткәрҙәренә генә түгел, ә ғөмүмән, Ватанды һаҡлау буйынса хәрби хәрәкәттәрҙә, Афғанстанда йәки һуғыш барған башҡа дәү­ләт­тә хәрби һәм башҡа хеҙмәт бурысын үтәгән, Чернобыль АЭС-ындағы, “Маяҡ” етеш­тереү берекмәһендәге, Тинес йылғаһындағы кеүек ҙур һәләкәт эҙемтәләрен бөтөрөүҙә ҡатнашҡан кешеләрҙең барыһына ла ҡағыла. Ошо уҡ даирәгә бәлиғ булмағандар, СССР һәм Рәсәй Федерацияһының дәүләт наградалары менән бүләкләнгән кешеләр, бәлиғ булмаған һәм инвалид балалы ҡатындар һәм ирҙәр, йөклө ҡатындар, аңлы рәүештә енәйәт ҡылып та, иректән мәхрүм ителмәгән йәки язаны үтәү ваҡыты кисектерелгән кешеләр инә. Шул уҡ ваҡытта элегерәк амнистияға эләккәндәргә, рецидивистарға, террорсы­лар­ға, кеше үлтереүселәргә, көсләүселәргә, та­лау­сыларға, наркотик менән сауҙа итеү­селәргә, ришүәт алғандарға, ауыр енәйәт ҡылғандарға был сара ҡағылмай.