15 майҙа Республика йортонда Башҡортостан Башлығы Рөстәм Хәмитов Шанхай хеҙмәттәшлек ойошмаһының генераль секретары Дмитрий Мезенцев менән осрашты.

Һөйләшеүҙә республиканың саммит­тарға әҙерлеге һәм был сараларҙың артабанғы үҫеш өсөн әһәмиәте тикшерелде.
– ШОС дәүләттәре башлыҡтарының саммитын үткәреүгә әҙерлек тамамланып килә, – тине Рөстәм Хәмитов. – Отелдәр әҙер ти­ерлек, Конгресс-холда эш тамамланды. Өфө­ләге меңгә яҡын йортто рекон­стру­к­ция­ланыҡ, яңырттыҡ. Ҡала күр­кәм­ләнде. “Өфө – Аэропорт” автомобиль юлын тө­ҙөк­ләндереү тамамланып килә. Ошо көн­дәрҙә аэропортта яңы терминал асылды. Ҡыҫҡаһы, яҡын арала Өфө саммиттарға тулыһынса әҙер буласаҡ.
Дмитрий Мезенцев үҙ сиратында Өфөләге тәьҫораттары менән уртаҡлашты, ойошма илдәре өсөн саммиттар — йылдың төп ваҡиғаһы, тип билдәләне.
– Ҡабул ителәсәк мөһим документ­тарҙың береһе — ШОС-тың 2025 йылға тиклемге үҫеш стратегияһы, — тине ул. — Был — ойош­ма ағзалары булған илдәрҙең арта­банғы эҙмә-эҙлекле үҫешен һәм бәйлә­нешен тәьмин итәсәк ябай документ ҡына түгел, ә төбәктә ШОС-тың пози­цияһын ны­ғытыуға, халыҡ-ара мәсьәлә­ләрҙә әүҙе­ме­рәк ҡатнашыуға этәргес. ШОС стра­те­гияһының ойошмаға нигеҙ һалған дәүләт башлыҡтары тарафынан тап Өфө­лә ҡабул ителеүен хәтерҙә тотасаҡбыҙ.

***

Ошо уҡ көндә Рөстәм Хәмитов Рәсәйҙең транспорт министры Максим Соколов менән осрашты. Сарала төбәктәрҙәге юл инфраструктураһы проекттарын, шул иҫәптән дәүләт-шәхси партнерлыҡ ниге­ҙендә тормошҡа ашырылған проекттарҙы финанслау мәсьәләләре ҡаралды.