Зәйнәб Биишеваның һүҙҙәренә яҙылған “Алтын балдаҡ” йыры менән Белорет һандуғасы Роза Аҡкучукова юбилей кисәһендә сихри йөрәктән сыҡҡан моңло тауышы менән тамашасыларҙы әсир итте.
Сәхнәлә һәр яҡлап һоҡландырҙы Роза. Башҡорт һандуғасы тура­һын­да нимә генә яҙһаң да, һөйләһәң дә, аҙ булыр һымаҡ. Оҙаҡ йылдар Өфө ҡалаһында йәшәп, концерттарына йөрөп торһам да, уның менән яҡын­дан танышырға тура килмәне. Ҡыҫҡа ғына осрашыу мәлендә Роза шундай аҡыллы, йор һүҙле, ябай­лығы менән үҙенә тартып торған әҙәпле кеше булып йөрәккә уйыл­ды. Бына нисек булырға тейеш ысын йырсы!
Хәтеремдә, уҙған быуаттың 70-се йылдарында халыҡ араһында Фәриҙә Ҡудашеваға тиң булырҙай йырсы эҙләйҙәр икән тигән хәбәр таралды. Күп тә үтмәне, педучилищела Роза исемле бик талантлы ҡыҙ уҡый икән тигән хәбәр ишетел­де. Миндә ҙур ҡыҙыҡһыныу тыуҙы. Ҡасан ишетербеҙ, күрербеҙ тип түҙемһеҙләндем. Тиҙҙән “Алтын бал­даҡ”, “Һин ултыртҡан муйыл” йырҙарын Башҡортостанға яңғы­рат­ты Роза Аҡкучукова. Тора-бара ул композиторҙар Рим Хәсәнов, Хөсәйен Әхмәтовтың әҫәрҙәрен башҡарып, киң танылыу яуланы. Замандашыбыҙ Хоҙай тарафынан бирелгән талантын түкмәй-сәсмәй халҡына бирҙе. Концерт барышында тамашасы йөҙҙәрсә рауза сәскәһе менән сәхнәне тултырҙы.
Розабыҙға ихлас күңелдән шу­лай тип әйтке килә: сәнғәттә юғары урын биләйһең, һәр саҡ шулай матур, ғорур булып ҡал. Рәхмәт һиңә! Тамашасыларҙы яңы йырҙар менән ҡыуандырып, илһамлан­дырып тор.