Был студенттарға төп фәндәрҙән алда тәүлектәге 24 сәғәтте дөрөҫ һәм тулы ҡеүәткә ҡулланыу серҙәрен өйрәтәләрме икән әллә, тип уйлап ҡуям М. Аҡмулла исе­мендәге БДПУ-ның башҡорт филологияһы факультеты яулаған яңы үр йә ойош­торған сара хаҡында ишет­кәс. Һәр яҡлап та әү­ҙем­лектәренең ғилләһен асыҡлар өсөн “Ҡорос” фольклор-театр ансамбленең от­чет концертына юлландым.

Шығырым тулы тамаша залында тәртип, тынлыҡ урынлашҡан. Студенттар ҙа, уҡы­тыу­сылар ҙа етди, байрамса кәйефтә. Беҙ ҡараясаҡ театрлаштырылған концерт бөйөк Еңеүҙең 70 йыллығына арналған, исеме – “Һуғыш әрнеүҙәре йөрәктә...” Әммә шаршау яу яланын тасуирлаған сығыштан түгел, ә башҡорт халҡының һүҙ сәнғәтенең ҙур ҡомартҡыларының береһе — “Урал батыр” эпосынан өҙөк сәхнәләштереү менән асыл­ды. Урал менән Шүлгәнде, уларҙың ата-әсәһен, Һомай ҡошто уйнаған һәр студент изгелек һәм яуызлыҡ, тоғролоҡ һәм хыянат төшөнсәләре менән һуғарылған әҫәрҙең асылын тулы сағылдырҙы, тойғо-кисерештәре аша заман шаңдауын яңғыратты.
Факультеттың иң әүҙем студенттарынан булған Гөлнур Хужәх­мә­това, Гүзәлиә Миңле­баева ишет­тергән һоҡланғыс моңло йырҙар, күмәк ҡыҙҙар башҡары­уындағы бейеүҙәр тамашаны тын да алмай ҡарарға мәжбүр итте. Нәжиб Асанбаевтың “Яралы яҙмыш” дра­ма­һынан өҙөк күрһәткән студент­тарҙың йәш­леге, эскерһеҙ их­лас­лығы менән йәлеп иткән уйыны үҙе бер ғәжәп күренеш булды.
Концерт барышында һәр “артист” сәхнәлә үҙен тотошо, асыҡ, ҡыйыу тауышы, хатта ҡарашы менән ысын театр әһелдәренекенән һис тә ҡалышманы. Ҡасан һәм нисек итеп бөтәһенә өлгөрәләр һәм өйрәнәләр икән тигән һорауыма яуап таптым, буғай. Баҡти­һәң, Мостай Кәрим исемендәге Милли йәш­тәр театры актеры Илнур Лоҡманов, “Ҡорос” ансамбле менән өс йыл дауамында шөғөл­ләнеп, студенттарға сәхнә серҙәрен аса, белем өләшә.
– Ай һайын бер тамаша әҙер­ләйбеҙ. Һуңғы осорҙа “артиста­рыбыҙ”ҙың актерлыҡ оҫталығын байтаҡ туплағанын тойоп, Наил Ғәйетбаевтың “Ауылға ҡыҙҙар килде” коме­дияһы буйынса спектакль сығарҙыҡ. Уның менән “Ҡорос” төрлө район-ҡалаларҙа ла сығыш яһап өлгөрҙө, халыҡ бик дәррәү ҡабул итте, – ти етәксе. – Ә был театрлаштырылған тамаша минең күптәнге хыялым ине. I – IV курс студенттарының һәләттәре, тырыш­лығы менән маҡсатыбыҙға өлгәш­тек, тип уйлайым.
“Һуғыш әрнеүҙәре йөрәктә...” концертының милләтебеҙҙең шаулы үткәне, киләсәге өсөн борсолоп та, ғорурланып та ижад ителгән шиғырҙар теҙмәһе менән тамамланыуы осраҡлы түгел. Ә уларҙы үҙ йөрәге аша үткәргәндәй әсенеп, сәмләнеп һөйләгән студенттарға “афарин” тип әйтмәй булмай. Татыу, дәртле, камиллыҡҡа ын­тыл­ған егет һәм ҡыҙҙарҙың әүҙемлек сере һәр эште үҙ ваҡытында, ҡоростай ҡеүәт, Аҡмул­ланыҡылай тәрән, төплө белем ярҙамында башҡарыуҙа икә­ненә лә төшөндөм тамаша аҙа­ғында.