Бөйөк Еңеүҙең 70 йыллығы хөрмәтенә республикабыҙҙа төрлө саралар ойошторола, бөгөн дә бихисап тантана бара. Был уңайҙан ҡала-райондарҙа ниҙәр эшләнде? Шаран районының Дүртөйлө ауыл биләмәһе башлығы Ләйсән ҒИБӘТОВА ошо хаҡта һөйләй.
– Бөйөк Ватаны һуғышында Дүртөйлө ауыл Советы биләмәһенә ҡараған ауыл­дар­ҙан 210 кеше ҡатнашҡан, күп­тә­ре яу яланында башын һалған. Шулар ара­һында Йәрәмкә ауылынан Дан ордены­ның тулы кавалеры Сәлих Сабитов – ғо­рур­лығыбыҙ. Сәлих Ғиздәт улы һуғыштың тәүге көндәренән үк фронтҡа үҙе теләп киткән, күп батырлыҡтар күрһәткән. Старшина Сабитов – тыныс тормошта Энгельс исемен­дә­ге колхозда эшлә­гән, төрлө вазифалар биләгән, ғүмере буйы ауылының киләсәге өсөн янған ир-уҙаман.
Сәлих Сабитов исемендәге аллея бул­дыр­ҙыҡ, мәктәп алдында уға һәйкәл дә ҡу­йыл­ды. 2012 йылда ауыл­да­шыбыҙҙың 100 йыл­лығын ҙурлап билдәләнек. Уҡыу­сылар батырҙың ҡәберен тәрбиәләүҙе үҙ өҫтөнә алды.
Һуғыш ветерандарына рәхмәт һүҙҙәрен етерлек әйтәбеҙме, хөрмәт-ҡәҙерҙе тейе­шен­сә күрһәтәбеҙме? Ошо һорау миңә генә түгел, бүтәндәргә лә тынғылыҡ бирмәне. Күптәнге хыялды тормошҡа ашырҙыҡ. Ихтирам йөҙөнән Бөйөк Ватан һуғышында ҡатнашыусыларға бағышлап мемориаль таҡ­таташ урынлаштырҙыҡ. Ул Йәрәмкә ауы­лындағы иң күркәм урында – социаль-мәҙәни үҙәк алдында – балҡып тора. Эргә­һендә генә Бөйөк Еңеүҙең 70 йыллығына арнап аллея ла булыр. Хәҙер бөтә нәмә аҡса менән иҫәпләнгәндә, был тәң­гәлдә ярҙам ҡулы һуҙыусыларҙың барлығы ҡыуандыра. Мәҫәлән, фермер Фәйзуллин сығымдарҙың ҙур өлөшөн ҡапланы, шулай уҡ халыҡ был эшкә дәррәү ҡушылды.