Быйылға кишер сәсеү ваҡыты үтеп бара. Әммә кәңәштәребеҙ киләһе йылға ла кәрәк буласаҡ. Кишер эре булып үҫһен өсөн түбәндәге эштәрҙе башҡарығыҙ.
l Сүп-сар үләне күпләп үҫкән урынға ултыртмағыҙ. Сәсеү менән түтәлде ута­ғыҙ. Кишер үҫә башлағас, сүптән ҡотолоу ауырлашасаҡ.
l Бик ҡуйы итеп сәсмәгеҙ. Орлоҡто ергә һибеп сыҡҡандан һуң уны тупраҡ менән ҡаплағыҙ (5 мм ҡалынлығында). Әгәр туп­раҡты һалам йәки бесән менән бер аҙ аралаштырһағыҙ, был дымды һаҡларға ярҙам итер, һыу һипкәндә лә орлоҡҡа зыян килмәҫ.
l Кишер яҡтылыҡ һәм ашламалы тупраҡ ярата. Уны күләгәһеҙ, ташһыҙ ергә ултыртығыҙ. Органик матдәләргә бай тупраҡта кишер күпкә һәйбәтерәк үҫә.
l Кишерҙе һуңғы ҡырауҙан ике-өс аҙна алдараҡ ултыртыу яҡшы. Сәсергә бер аҙна ҡалғас, бының өсөн әҙерләнгән түтәлде тырматығыҙ һәм ашлама индерегеҙ. Орлоҡ шытып сыҡһын өсөн ерҙең температураһы мөһим. Тупраҡтың температураһы 5 градустан түбәнерәк булһа, ул тиҙ генә сыҡмаясаҡ. Шытыу өсөн иң ҡулайы — 10 градус. Был осраҡта орлоҡ ун көн эсендә сығырға тейеш.