Райондың элекке радиотапшырыуҙар студияһы мөхәррире, Башҡортостандың атҡаҙанған мәҙәниәт хеҙмәткәре Фирҙәүес Маликованы тынғыһыҙ, фиҙакәр кеше тип беләбеҙ.

Йәш сағынан спорт, сәнғәт ме­нән дуҫ ҡыҙ еңел атлетика менән шөғөлләнә, волейбол уйнай, велосипед, саңғы ярыштарында ҡат­наша, призлы урындар яулай. Дыуан ауыл хужалығы техникумында уҡып, зоотехник һөнәренә эйә була. 1963 йылда Илеш райо­нына эшкә ебәрелә, хеҙмәт юлын Үрге Йәркәй урта мәктәбендә уҡытыусы булып башлай.
Йәмәғәт эштәрендә әүҙем ҡат­наш­ҡан ҡыҙҙы ВЛКСМ райко­мы­ның икенсе секретары итеп һай­лай­ҙар. Райондың радиотап­шы­рыуҙар студияһы мөхәррире һәм дикторы итеп раҫланғас, “Йәшлек” радиожурналын ойоштора. Фирҙәүес Фәттәх ҡыҙы баш­ҡорт халҡының ғөрөф-ғәҙәттәрен тергеҙеү буйынса әүҙемлек күрһәтә.
Ҡатмарлы һәм мауыҡтырғыс һөнәргә 34 йыл ғүмерен бағышлай ул. Йәмәғәт тормошоноң урта­һында ҡайнай, район Советы депутаты итеп һайлана, төрлө ко­миссияларҙың әүҙем ағзаһы, ҡатын-ҡыҙҙар советы рәйесе урынбаҫары вазифаһын башҡара. Икенсе Бөтә донъя башҡорттары ҡоролтайында делегат булып ҡатнаша.
Тынғыһыҙ Көйөргәҙе ҡыҙы Баш­ҡорт ҡатын-ҡыҙҙары йәмғиәте ойошмаһы һәм “Башҡортостан ҡы­ҙы” журналы редакцияһы тарафынан ойошторолған “Башҡорт ҡа­тыны — милләт әсәһе” I республика бәйгеһендә “Өлкән йәштәге ҡатын-ҡыҙ” номинацияһында II урын­ды яуланы.