Һәр кешенең, ғаиләнең күңеленә яҡын байрамы, иҫтәлекле көнө була.
9 Майҙың иһә бөтөн Рәсәй халҡын бергә туплар ҡеүәте бар. Еңеүселәрҙең нәҫел-быуыны булараҡ, уртаҡ байрамыбыҙҙа күмәкләп шатланабыҙ, ғорурланабыҙ, тулҡынланабыҙ, һағыш кисерәбеҙ. Был тойғолар сылбыры өҙөлөп ҡалмаҫмы? Бөгөнгө мәктәп уҡыусылары Еңеүҙең ҡиммәтен аңлап, үҙ балаларына еткерә алырмы?

Кисә Башҡортостан Дәүләт Йыйылышы – Ҡоролтай йортонда уҙған “Мин – Бөйөк илдең гражданы” тигән проекттың еңеүселәрен бүләкләү тантанаһында ошо һорауҙарға яуап таптыҡ кеүек. Илһөйәрлектең тамы­ры ныҡ беҙҙә! Билдәле булыуынса, Дәүләт Йыйылышы – Ҡоролтай яр­ҙа­мында II – XI класс уҡыусылары өсөн ойошторолған әлеге мәғрифәт-ватансылыҡ проектында йөҙ меңдән ашыу йәш быуын вәкиле ҡатнашҡан. Сара барышында балалар ветерандар менән осрашҡан, һуғыш йылда­ры, ата-бабаһының ҡаһар­ман­лығы, тыл хеҙмәтсәндәренең фиҙакәрлеге тураһында шиғыр, эссе яҙған, һүрәт төшөргән, олимпиадаларҙа һынау тотҡан. Еңеүселәр әлеге күркәм байрамға саҡырылған.
Дәүләт Йыйылышы – Ҡоролтай йортоноң икенсе ҡатында проектта ҡатнашҡандарҙың һүрәттәренән күргәҙмә ойошторолғайны. Ошонда Өфөләге 27-се мәктәптең II класс уҡыусыһы Виктория Аверьянова менән әңгәмәләшеү насип булды.
– Һүрәт конкурсында ҡатнашып, еңеү яулауыма ифрат шатмын, – тине ҡыуанысын йәшермәгән ҡыҙ. – Бөйөк Ватан һуғышында дүрт олатайым ҡатнашҡан. Икәүһе яуҙа батыр­ҙар­са һәләк булған, өсөнсөһө аяҡ­­һыҙ ҡайтҡан, дүртенсеһе орден менән бүләкләнгән. Олатай­ҙарымдың барыһы ла – герой! Улар менән сикһеҙ ғорурланам. Бындай конкурс киләһе йылда ла үткәрелһә, мотлаҡ ҡатнашасаҡмын.
Еңеүселәрҙең шатлығын ур­таҡ­лашырға Дәүләт Йыйылышы – Ҡо­ролтай Рәйесе урынбаҫары Йо­ма­бикә Ильясова, депутаттар Эль­вира Айытҡолова, Александр Дегтев, Эдуард Сәйетбатталов, Бөйөк Ватан һуғышы ҡаһарманы Петр Сергеев һәм башҡалар килгәйне.
– Заман техникаһы күп нәмәне үҙгәртә ала, әммә уның ҡаты бәғерҙе иретергә көсө етмәй. Ә әҙәбиәттең, сәнғәттең бындай ҡеүәте сикһеҙ, – тине сығышында Йомабикә Сәләхет­дин ҡыҙы. – Еңеүгә арналған ижад эштәре башҡарып, һеҙ күңел көсө­гөҙҙө, рухлы булыуығыҙҙы, беле­мегеҙҙе күрһәттегеҙ. Хеҙмәтегеҙ өсөн ҙур рәхмәт, балалар!
Бүләкләү тантанаһынан һуң уҡыу­сылар Дәүләт Йыйылышы – Ҡо­ролтай йорто менән танышты, Парламентаризм музейын ҡараны.