Бөгөн – сәйәсмән, Коммунистар партияһын һәм Совет республикаһын төҙөүсе, совет дәүләтенең иң беренсе етәксеһе, халыҡ-ара ком­мунис­тик хәрәкәттең лидеры Владимир Лениндың тыуған көнө. Һеҙ был датаны хәтерләйһегеҙме?

Ләлә БЕЙЕШЕВА, йәмәғәт эшмә­кәре:
– Ваҡытында Лениндың тыуған көнө ҙур байрамға әйләнә торғайны. Бөгөн уның шәхесен түбәнһетеп күрһәтергә тырышһалар ҙа, заманында Ленин бабайыбыҙҙан да бөйөк кеше юҡ ине – ул беҙгә белем бирҙе, колхоз-сов­хоз­дарҙы ойоштороп, халыҡты берләш­терҙе. Ә Ильич лампаһы үҙе бер тарих булып иҫтә ҡалды. Әле булһа хәтер­ләйем: ниндәй генә ауыр ваҡытта йә­шәһәк тә, хәреф тә танымаған оло йәштәгеләр өсөн ликбездар асылды, ҡәләм, дәфтәр, әсбаптар бушҡа таратылды.

Зөлхизә КАМАЛОВА, уҡытыусы:
– Элегерәк 22 апрелдә −– Владимир Ильич Лениндың тыуған көнөндә – пионер сафына алыу тантанаһы уҙға­рыла торғайны. Мәктәптә уҡығанда октябрят, пионер булыр мәлде түҙем­һеҙ­лек менән көтөп алғанымды хәтерләйем. Ул тантаналы минуттарҙы һис тә оноторлоҡ түгел. Ал галстук таҡҡан, тантаналы марш аҫтында торба ҡысҡыртҡан, барабан ҡаҡҡан, ниндәйҙер идеяларға инанып йәшәгән, юғары әхлаҡ өлгөһө булған шәхестәргә оҡшарға тырышҡан балалар, йәш быуынды берҙәмлеккә туплаған ойошма юҡ инде.

Сабир ХӘКИМОВ, пенсионер:
– СССР тарҡалғанға тиклем Владимир Ленин исемендәге Бөтә Союз пионер хәрәкәте илдәге балаларҙың һәм үҫмерҙәрҙең иң ҙур ойошмаһы булды. Бөгөнгө заман балалары араһында Владимир Ильич Лениндың кем икә­нен дә белмәгәндәрҙең булыуы ҡыҙ­ға­ныс, әлбиттә. Беҙҙең мәктәп йыл­дары­быҙ ошо пионер булыуыбыҙ, нимәгәлер инанып йәшәүебеҙ, шәхес булараҡ камиллыҡҡа ынтылыш тәр­биә­ләгән ойошма эше менән йәмле булған икән. Шуның өсөн дә яҡын һәм ҡәҙерле ул сағыу хәтирәләр һаҡлаған пионерия.

Айгүзәл ИҪӘНБАЕВА, тәрбиәсе:
— Лениндың тыуған көнө уңайынан балалар баҡсаһында ятлаған шиғырым әле һаман иҫтә:
Сәскәләр йыйып алдым да,
Шунан букет яһаным.
Ошо букетты
Ленин һүрәте янына һалам...

Фәнзил СӘЛИМОВ, эшҡыуар:
— Беҙҙең бала саҡ йылдары Ленин бабайҙың исеме лә, эштәре лә онотолған заманға тура килде. Шулай ҙа уның беренселәрҙән булып Ком­мунис­тар партияһын төҙөүе, ер йөҙөндә тәүгеләрҙән булып социалистик дәү­ләт­кә нигеҙ һалыуы хаҡында тарихтан белеп үҫтек. Шәхсән тыуған көнөнә килгәндә, ғәҙәттә, 22 апрель еттеме, өмәләр башланып китә торғайны. Әле лә шулайыраҡ, ахыры.