Мәктәптә уҡыған һәр бишенсе бала тәмәке тарта! Был ҡот осҡос мәғлүмәт Башҡортостан Республикаһы Дәүләт Йыйылышы – Ҡоролтай ҡарамағындағы Йәштәр палатаһы ойошторған “түңәрәк өҫтәл”дә яңғыраны. Унда ҡатнашыусылар тәмәкегә ҡаршы закондарҙың үтәлеше буйынса фекер алышты.

Ә был өлкәләге ҡануниәттең үтәлеше һис тә маҡтанырлыҡ түгел. Өфө ҡала медицина профилактикаһы үҙәгенең баш табибы Сара Әхтәмова белдере­үенсә, һорау алыуҙа 75,5 процент кеше: “Тәмәке тар­тыуҙы һәм һатыуҙы сикләү саралары күҙәтелмәй”, – тип яуап биргән. Хә­йер, уныһы былай ҙа асыҡ күренә: урам­да йөрөгән йәштәрҙең бик күптәренең ҡулында – сигарет. Ир-ат бер хәл, йәш ҡыҙ­ҙарҙың, бигерәк тә коляскалы йәш әсә­ләрҙең, хатта йөклө ҡатындарҙың тәмәке төтөнө йотоп йөрөүе беҙҙең ха­лыҡтың санитар мәҙәниәте бик түбән булыуын күрһәтә. Рәсәйҙә йәмғеһе 44 миллион тә­мәкесе иҫәпләнә.
– Медицинала “тәмәке тар­тыуҙан үлде” тигән термин юҡ, әм­мә сирҙең тәмәке арҡаһында көсәйеүе бәхәсһеҙ факттар менән нығытылған, – тине “Роспотребнадзор”ҙың Башҡортостан буйынса идаралы­ғының коммуналь гигиенаны күҙәтеү бү­леге етәксеһе Лариса Кильдюшова.
Уның аңлатыуынса, ирҙәр ара­һында үпкә яман шеше менән ауырып китеү ос­раҡтары бер кимәлдә ҡала, ә бына ҡатын-ҡыҙҙа ул арта төшкән, сөнки тәмәкесе гүзәл заттың һаны ла күбәйә.
Халыҡтың тәмәке менән мауы­ғыуы арҡаһында былтыр ил иҡт­исадына 7 миллиард һумдан ашыу зыян килгән, шул иҫәптән дауаханалар 600 миллион һумдан ашыу сығым түккән, сирләгән көндәр өсөн түләүгә 150 миллион һум тотонолған.
“Түңәрәк өҫтәл” Башҡортостан­да “Граж­дандарҙы тирә-яҡтағы тәмәке төтөнөнән һәм тәмәкене ҡулланыу эҙемтәләренән һаҡлау тураһында”ғы Федераль законды тормошҡа ашырыу буйынса ведомство-ара тәжрибә уртаҡлашыу маҡсатында тәҡ­дим­дәр ҡабул итте, ул Йәштәр палата­һына, төрлө ойошмаларға, үҙидара ор­ган­да­рына ебәреләсәк.