Бөтә донъя башҡорттары ҡоролтайы Башҡарма комитетының республика Хөкүмәте һәм “Айыҡ Башҡортостан” төбәк йәмәғәтселек хәрәкәте менән берлектә ойошторған “Айыҡ ауыл” конкурсына Илеш районы хакимиәте быйыл да ихлас ҡушылды.

Конкурс өсөн “Сәләмәт тормош рәүешен пропагандалау — иң яҡ­шы практика”, “Халыҡты физик һәм рухи йәһәттән һауыҡтырыу буйын­са берҙәм эшмәкәрлектең иң яҡшы өлгөһө”, “Ауылдаштарҙы әүҙем тор­мошҡа йәлеп итеү буйынса халыҡ башланғысының иң яҡшы өлгөһө”, “Яҡшылыҡ ҡыл” (хәрәкәт лидер­ҙары, йәмәғәт эшмәкәрҙәре һәм совет депутаттары араһында конкурс), “Киң мәғлүмәт сараларында иң яҡшы мәҡәлә” тигән номинациялар булдырылды. Бәйгегә йомғаҡ яһағанда ҙур тырышлыҡ күрһәткән кешеләрҙең, етәкселәрҙең, бел­гес­тәрҙең, полиция хеҙмәткәрҙәренең эшмәкәрлеге айырым баһа аласаҡ. Еңеүселәргә район хакимиәтенең Рәхмәт хаты һәм иҫтәлекле бү­ләк­тәр тапшырыласаҡ.
Быйыл конкурсҡа тәүгеләрҙән булып Иғмәт ауыл Советы ҡушыл­ды. Унда төрлө тармаҡ, ойошма, киң йәмәғәтселек вәкилдәре ҡат­нашлығында күркәм байрам сара­һы үтте. Мәҙәниәт йортонда ра­йон оҫталарының ҡул эштәренән күр­гәҙ­мәләр ойошторолдо.
Сарала ҡатнашҡан кешеләр ошонда уҡ “Серҙәш” клубы эшмә­кәрлеге менән танышты. Уның ағза­лары халыҡты борсоған эскелек, наркомания, тәмәке тартыу һәм башҡа проблемалар тураһында даими фекер алыша, китап уҡыу­сылар конференциялары, йәштәр араһында төрлө ярыштар, “түңәрәк өҫтәл”дәр ойоштора.
Ҡунаҡтарға артабан Иғмәт ауыл үҙешмәкәрҙәре әҙерләгән “Донъя­ны ҡотҡара матурлыҡ һәм ба­тырлыҡ” тигән әҙәби-музыкаль тамаша күр­һәтелде.