Билдәле сәсәниә, Башҡортостандың атҡаҙанған мәҙәниәт хеҙмәткәре Асия Ғәйнуллина проекты буйынса ике тиҫтә йыл рәттән дауам иткән “Урал батыр” эпосын яттан һөйләү конкурсы быйыл да юғары кимәлдә уҙҙы. Ун көн дауамында барған бәйгелә өс йәштән алып 180-ләп кеше ҡатнашты.

Борон-борондан батшаларҙың, ил башлыҡтарының эргә­һендә ил-көн яҙмышын хәстәрләп ҡайғыртҡан шағирҙары, им-томсолары, күрәҙәселәре, сәсәндәре булған. Ығы-зы­ғылы, шау-шыулы заманда бер төрлө уйлап, икенсене һөйләп, өсөнсө төрлө йәшәгән мәлдә, халыҡты хәҡиҡәткә әйҙәп, үҙ ваҡытында әйтелгән һүҙ бөгөн үтә лә ҡиммәт. Хәҡиҡәткә ынтылған кешегә һәр ваҡыт еңеү юлдаш. Тарихта быға миҫал бик күп. Шундайҙарҙың береһе – Ислам дине тәғлимәтен юғары дәрәжәгә күтәргән философ, шәйех Зәйнулла Рәсүлев. Ул, кешелеклелек булмышын үҫтереү маҡсатында, шәкерттәрен сәхрәгә алып сығып, зекер, салауат әйттергән. Ә ҡырғыҙҙарҙың ҡайһы бер ауылдарында “Манас”ты яттан белмәгән ҡыҙҙар бөгөн дә кейәүгә сыға алмай икән…
Беҙҙең төбәктә лә “Йәш сәсәндәр” бәйгеһен уҙғарыу күр­кәм, оло байрам йолаһына әүерелеп китте. Әйтәйек, “Урал батыр” эпосын бер нисә телдә яттан һөйләү һәләтен үҫ­те­реүгә йылдан-йыл иғтибар арта. Донъяуи, ғәҙеллек һәм тоғролоҡ менән һуғарылған данлыҡлы һәм бөйөк башҡорт халыҡ эпосын һәр милләт балаһы тиҙ отоп ала.
– Ирекле һүҙ әйтергә төрлө саралар, конкурстар аша өйрәтәбеҙ йәш быуынды, – ти ҡала хакимиәтенең мәғариф бүлеге методисы Айһылыу Мирсәйет ҡыҙы Моталлапова.
Кемдер, ул бит Аллаһы Тәғәлә тарафынан инселәнгән­дәргә бирелгән һәләт, тиеүе бар. Хаҡ һүҙ. Әлбиттә, сәсәндәр байрамында ҡатнашыусыларҙың барыһы ла сәсән телле булып бөтмәҫ, әммә уларҙың һәр ҡайһыһына өр-яңы хәҡиҡәт асылыр, рухи үҫешкә көйләнерҙәр...
Быйылғы йыйын барышы мәктәпкәсә йәштәге балалар­ҙың, төрлө йәштәге мәктәп уҡыусыларының, студенттарҙың һәм өлкән йәштәге тәрбиәсе-уҡытыусыларҙың ихлас ҡат­нашлығында шаулап-гөрләп уҙҙы. Күбеһе ҡурай, ҡумыҙ, дөңгөр, йыр-моң, һамаҡлау, хатта бейеү аша үҙ сы­ғыш­та­рын бер бөтөн итеп биҙәп, көсәйтеп, тамашасы хөкөмөнә тәҡдим итте. Мәҫәлән, 1-се мәктәптән I класс уҡыусылары Илзирә Мырҙағәлина, Искәндәр Низаметдинов, 12-се мәк­тәптән Лилиә Арыҫланова (3-сө урын), IV класс уҡыусыла­ры Алина Фәйезова (2-се урын), Әмилә Ғөбәйҙуллина (1-се урын), башҡорт лицейынан IV класс уҡыусыһы Алтынгөл Бикташева, 9-сы лицейҙан III класс уҡыусыһы Алина Күсәрбаева, IV класс уҡыусыһы Есения Смирновская, 6-сы мәктәптән Әҙилә Ғибәҙуллина үҙ тиҫтерҙәре төркөмөндә алдынғы урындарҙы яуланы. Ә иң-иңдәр араһында гран-при башҡорт лицейының IV класс уҡыусыһы Ғайсар Нәҙерғолов өлөшөнә төштө.
“Урал батыр” эпосын башҡарыусы йәш сәсәндәрҙең ҡала конкурсына үҙ балаларын әҙерләүҙә йәш ата-әсәләрҙең тырышлығы ғәйәт ҙур. Бигерәк тә Алмас Абдулловтың, Ксения Попованың, Даян Лотфуллиндың, Динислам Бәхтиев­тең, Динислам Абыҙгилдиндың, Рәил Исламғоловтың ата-әсәһе маҡтауға лайыҡ.
Тормоштағы ҡәҙимге балалар сәхнәлә ябайҙан да ябай, ижади азатлыҡ кисерҙе. Әйтәйек, “Баҙлауыҡ” балалар баҡсаһынан өс йәшлек Рүзилә Исламғолова, дүрт йәш­лектәр араһынан “Сулпылар” балалар баҡсаһынан Зәлиә Хөснитдинова, биш йәшлектәр төркөмөндәге ярышта Алтынай Әхмәтова беренселекте алһа, алты йәшлектәр ара­һында уңышты “Тирмәкәй”ҙән Данис Шаһыбалов менән “Ҡурай” балалар баҡсаһынан Тимерхан Хәсәнов бүлеште. Ә иң ҙур бүләк – гран-при “Ҡурай” балалар баҡсаһы тәрбиәләнеүсеһе Эмиль Иҫәндәүләтовҡа эләкте.
“Урал батыр” эпосын башҡарыусылар конкурсының төп маҡсаты халҡыбыҙҙың бөйөк ҡомартҡыһының мәңге үлем­һеҙ булыуын иҫбат итеү ине. Был юҫыҡта Наилә Әхмәтвә­лиева, Сулпан Хәсәнова, Зәлиә Ирназарова, Гөлкәй Хә­сә­нова, Нәғимйән һәм Сәлимйән Дәүләтбаевтар, Динар Шәрипов, Розалия Хөснуллинаның сығышы өлгө булыр­лыҡ. Дөйөм балдар буйынса V, VI, VII кластар араһында “Ирәндек” лицейынан Ләйсән Таңғатарова, VIII — XI класс уҡыусылары төркөмөнән Әлиә Ибраһимова, студенттар араһынан Зинира Баймөхәмәтова гран-приға лайыҡ булды.
Быйыл бәйгелә ун ике тәрбиәсе һәм уҡытыусы ҡатнаш­ты. Әйтәйек, тәрбиәселәр Зәлиә Ҡансурина, Нурзилә Һө­йәр­ғолова, Вәсилә Ҡаҙарбаева һ.б. Уларҙың сығышы, ҡөҙ­рәтле һүҙ аша мәғәнәле хис-тойғо биреү юлдарын күрһәтеп, рухты үҫтереүгә, һаҡлауға, киңәйтеүгә алып килһә, мәктәп уҡытыусылары араһында Р. Өмөтбаев исе­мендәге башҡорт лицейы уҡытыусыһы Гөлнара Ибра­һимова, телмәр этикетының ыҡсымлығын һәм яңғырашын ишеттереп, иң-иңдәр араһында гран-при яуланы.
Урал батыр тере һыу бөрккән һәм уның һөйәге һеңгән изгеләр, батырҙар төйәгендә бәйге бик күп яңы исемдәр асты.