Ватиканда Рим папаһы үҙ фекерен әйткәндән һуң төрөк-әрмән низағы яңынан ҡуйырҙы. “Әрмәндәрҙе ҡырыу – XX быуатта иң оло фажиғәнең бере­һе”, – тине Папа Еревандан килгән делегация алдында.
Анкара үҙ сиратында мәсьәләне асыҡлау өсөн илсеһен ебәрҙе.
***
Арктикалағы глобаль йылыныу, тә­би­ғәттең үҙгәреүе ундағы 201 хайуан һәм 195 ҡош төрөнә зыян килтереүе ихтимал.
***
Ғинуарҙа Американың Конвей ҡала­һында йәшәгән 37 йәшлек балыҡ­сы яхтаһында балыҡ тоторға юллана һәм кире әйләнеп ҡайтмай. Ул 66 көн буйына диңгеҙҙә юғалып йөрөй. Ошо көндәрҙә уны кәмәһе менән түңкәрел­гән килеш табалар. Шуныһы ғәжәп: балыҡсы иҫән була.
***
19 апрелгә ҡәҙәр Таиландта Яңы йылды байрам итәләр. Халыҡ урамға сығып, бер-береһенә һыу һибешеп күңел аса. Хатта был көндәрҙә полиция хеҙмәткәрҙәрен дә һыуға ҡойондорор­ға рөхсәт ителә.
***
Рәсәй Хөкүмәте пластик һауытта иҫерткес эсемлектәрҙе һатыуҙы сикләүҙе хупланы.
***
7 апрелдән Рәсәйҙә йыл һайын ҡа­бат­ланған “Тоталь диктант” яҙыу башланды. 18-ендә акцияла йырсы Дмит­рий Билан ҡатнашасаҡ. Ул телетапшы­рыуҙар алып барыусы Александр Архангельский һәм әҙәби тәнҡитсе Га­лина Юзефович менән Мәскәү дәүләт педагогия университетында диктант тексын уҡыясаҡ.
***
Рәсәй дауаханаларында үлем осраҡ­тары артҡан. Иҫәп палатаһы тикшергән һөҙөмтәләр буйынса, 17 мең 500 ауыл­да бер ниндәй ҙә медицина ярҙамы күрһәтеү урыны юҡ.
***
Тиҙҙән илдә ҡытай теле буйынса мәктәп олимпиадалары үткәрелә башлая­саҡ, ти мәғариф белгестәре.
***
Ҡар иреү сәбәпле, Алтай крайында 16 ауыл, ҡасабаны һыу баҫҡан.
***
Бөйөк Ватан һуғышында республи­каның һәләк бул­ған һәр яугире хөрмә­тенә ағас ултыртыласаҡ. Был эш 18 һәм 25 апрелдәге өмәләрҙә башҡары­ласаҡ.
***
Өфөлә өс айҙа 56 автомобилгә “айыу майы һөрткәндәр”. Уларҙың 35-е генә табылған.
***
Баш ҡаланың Инорс биҫтәһендә “Мәҙинә” мәсете асылды.
***
Благовар ҡошсолоҡ заводы яңы ҡаҙ тоҡомон уйлап сығарҙы. Селекция эше 2007 – 2014 йылдарҙа алып барылған. “Уральские серые” тип аталған ҡаҙ үҙенең күп үрсем биреүе, сыҙам­лылығы менән отошло. Уның тере килеш ауырлығы 6,5 килограмға етә икән.