…Гөлдәргә ни бары – 6 йәш, хәреф таныһа ла, әле яҙа белмәй. Шулай ҙа башҡорт теленән үҙ белемен һынап ҡарарға килгән әсәһенә оҡшатып, аҡ ҡағыҙға нимәлер сыймаҡлаған була. Ә уйлаһаң, ошо тәү ҡарашҡа мажара һымаҡ ҡына тойолған күренештә ниндәй оло мәғәнә ята! Телебеҙҙе ҡәҙерләү, яҡлау һәм данлау әсә һөтө менән бергә тәрбиәләнергә тейеш.

Гәзитебеҙҙә хәбәр итеүебеҙсә, уҙ­ған шәмбелә республика буйлап иҫ китмәле шәп акция үтте. Баш­ҡорт­остандың бер нисә ҡалаһында те­ләктәре булғандар башҡорт теле буйынса белем кимәлен һынай алды. Акцияның төп ойоштороусыһы – Башҡорт дәүләт университеты.
Стәрлетамаҡтар ҙа ситтә ҡалма­ны был күренештән, әлеге вуздың урын­дағы филиалында Яныбай Хам­ма­тов­тың “Башҡорттар китте һуғышҡа” романынан өҙөк буйынса диктант яҙырға 200-ҙән ашыу кеше йыйылды. Сара уҡыу йортоноң төп корпусында һәм бөтә филиалдарында бер үк ваҡытта (онлайн рә­үешендә) ба­рырға тейеш ине. Шуға Өфө менән алдан уҡ бәйләнеш булдырылды.
Бына тексты билдәле артист Хөр­мәтулла Үтәшев уҡый башланы. Тик... элемтә өҙөлөп, бәйләнеш туҡ­тап ҡалды. Хәйер, техниканың тиҫкә­реләнеүе генә рухты, телебеҙгә ҡа­ра­та булған һөйөүҙе ҡаҡшата алманы: диктантты уҡытыусы, ғалимә һәм шағирә Рәмзәнә Абуталипова яҙҙырҙы.
Әйткәндәй, парта артында ултырыусылар араһында бер стәрлета­маҡ­тар ғына түгел ине, Салауат ҡа­лаһы­нан, Ғафури, Мәләүез, Көйөргәҙе райондарынан да вәкил­дәр булды. Иң бә­ләкәй ҡатнашыу­сы­ға 14 йәш булһа, иң өлкәненә 60 ине. Шуныһы иғ­ти­барҙы йәлеп итте: абруйлы уҡытыу­сылар ҙа, уҡыусы­ла­ры менән бер парта артына ултырып, белемен тикшереп ҡарарға тартынманы.
Диктантҡа килгәндә, текст ауыр ғына булып тойолдо. Романдан өҙөк ҡатмарлы һүҙҙәргә, һүҙбәйләнеш­тәргә, һөйләмдәргә, шулай уҡ дата-һандарға бай булды.
Бер нисә көндән ойоштороусылар билдәләрҙе иғлан итер, әлбиттә. Миңә ҡалһа, телгенәм-бергенәм тип, акцияға ҡушылған һәр кешегә бөгөндән “бишле” ҡуйырға булалыр.